उच्च अदालत जनकपुरको अस्थायी इजलास वीरगञ्जका न्यायाधीश डा. खुसीराम थारूमाथि मोसो छ्याप्ने नेकपा नेकपा बहुमतका तीन जना कार्यकर्ताहरूलाई प्रहरीले जेठ २९ गते गिरफ्तार गरेको छ ।
हत्या घटनाका आरोपित नेपाली कांग्रेसका नेता एवम् पूर्व मन्त्री राजपुर नगरपालिका-४ का मोहम्मद अफताब आलमलाई उच्च अदालत वीरगञ्जका न्यायाधीश डा. खुसीराम थारू र अर्जुन महर्जनको ०८२ जेठ १४ गतेको इजलासले सफाइ दिएकाे थियो ।
उक्त फैसलाको विराेधमा ०८२ जेठ २९ गते नेकपा बहुमतका केन्द्रीय सदस्य प्यूठान जिल्ला गौमुखी गाउँपालिका-६ का ३८ वर्षीय अविनास भनिने किशोर कुँवर, नेकपा बहुमतका जिल्ला इन्चार्ज सर्लाही जिल्ला बरहथवा नगरपालिका-२ का ४३ वर्षीय पदम बहादुर मगर र नेकपा बहुमतका जिल्ला समिति सदस्य सिराहा जिल्ला गोलबजार नगरपालिकाका ४८ वर्षीय गर्भु महतोले नेपाल कम्युनिष्ट पार्टी बहुमत जिन्दावाद भन्दै न्यायाधीश बसेको स्थानमै पुगी न्यायाधीश थारुमाथि मोसो छ्यापेका थिए ।
मोसो छ्यापेका तीनै जनालाई प्रहरीले गिरफ्तार गरी थप अनुसन्धान गरिरहेको जिल्ला प्रहरी कार्यालयका डिएसपी किशोर लम्सालले जानकारी दिनु भयो ।