१५ वर्षीया दलित बालिकालाई यौन दुर्व्यवहार गरेको कसुरमा पाँचखाल नगरपालिका–६, तीनपिप्लेस्थित जोरपाटी माध्यामिक विद्यालयका शिक्षक मच्छेनारायण श्रेष्ठलाई जिल्ला अदालतले ०८२ वैशाख २३ गते २४ दिन कैद, ४५ हजार जरिवाना र ५० हजार क्षतिपूर्ति ठहर्ने फैसला गरेको छ ।
जिल्ला अदालत काभ्रेपलाञ्चोकका मुख्य न्यायाधीश मातृकाप्रसाद आचार्यको इजलासमा भएको अन्तिम पेशीमा आंशिक दावी पुग्ने फैसला भएको हो ।
१५ वर्षीया दलित बालिकालाई बलात्कार गरेको भन्दै श्रेष्ठलाई प्रहरीले ०८० पुस ८ गते गिरफ्तार गरेको थियो ।
पीडित बालिकालाई कात्तिक ११ गते बनेपाको एक होटलमा लगेर बलात्कार गरेको भन्दै पीडित पक्षले पुस ८ गते जिल्ला प्रहरी कार्यालयमा उजुरी दिएको थियो । पीडितलाई पटकपटक यौन दुर्व्यवहार गरेको भन्दै विद्यालयका विद्यार्थीहरूले पुस ८ गते विद्यालय अगाडि प्रदर्शन गरेका थिए ।
यस मुद्दामा जिल्ला सरकारी वकिल कार्यालयले ०८० पुस २६ गते जिल्ला अदालतमा अभियोग दर्ता गरेकोमा श्रेष्ठ पुस २९ गते पुर्पक्षका लागि धुलिखेल कारागार पठाइएको थियो ।
फैसलाअनुसार घटना बाल यौन दुर्व्यवहारमा परिणत भएको छ ।