अनौपचारिक क्षेत्र सेवा केन्द्र (इन्सेक) क्षेत्रीय कार्यालय नेपालगञ्जले तुलसीपुरमा भएको बम विष्फोटको घटनाको मङ्सिर १५ गते स्थलगत अनुगमन गरेको छ ।
क्षेत्रीय प्रमुख भोला महतको नेतृत्वमा आएको टोलीले मङ्सिर १२ गते तुलसीपुरमा भएको बम विष्फोटको घटनाका पीडित एवम् सरोकारवालाहरूलाई भेटघाट गरेको हो । अनुगमन टोलीमा इन्सेक क्षेत्रीय प्रमुख भोला महत, अभिलेख अधिकृत नारायण सुवेदी, इन्सेक जिल्ला प्रतिनिधि जे.एन.सागर र मानवअधिकार सञ्जाल दाङका संयोजक केशवकुमार शर्मा थिए ।
टोलीले घटनामा परी ज्यान गुमाएका म्यादी प्रहरी २३ वर्षीय विनोद चौधरीको तुलसीपुर उपमनपा-१२ क्वाँगीस्थित घरमै पुगेर पीडित परिवारसँग भेट गरेको छ । मृतकको घरमै पुगेर टोलीले परिवारप्रति समवेदना र मृतकप्रति श्रद्धाञ्जली व्यक्त गरेको छ ।
टोलीले घटनाको अवस्था, पीडित परिवारको अवस्था, उपचार र राहत तथा सहयोगको विषयमा परिवारसँग छलफल गरेको थियो । पीडित परिवारले घटना पश्चात घाइते चौधरीको उपचारका लागि राज्यले लापरबाही गरेको आरोप लगाए ।
मङ्सिर १२ गते दिउँसो पौने ४ बजे घटना भएको तर घाइतेको अवस्था गम्भीर भएपनि उपचारका लागि साँझ ७ बजेमात्रै नेपालगञ्ज लगिएकोले अत्यधिक रक्तश्रावका कारण विनोदको ज्यान गएको मृतकका दाजु जुगवीर चौधरीले बताए ।
उनले प्रधानमन्त्रीको चुनावी सभाको सुरक्षाका क्रममा बम विष्फोट हुँदा घाइते भएकाहरूलाई प्रधानमन्त्री चढेर आएको हेलिकोप्टरबाटै तत्काल उपचारका लागि लैजाने अवस्था हुँदाहुँदै पनि बेवास्ता गरिएको गुनासो गरे ।
जुगवीरले भने-‘प्रधानमन्त्री देउवाले घाइतेहरूलाई हेलिकोप्टरमा लगेको भए जीवन दान दिने थिए तर कसैले हेरेनन् । उपचारमा ढिलाई भयो र रगत बगेर भाइको अकालमै ज्यान गयो ।’
पीडित परिवारले घटना भएको ३ घण्टापछि मात्रै परिवारलाई जानकारी दिएको भन्दै तत्काल जानकारी पाएको भए आफूहरूले नै समयमा उपचारका लागि लैजान सक्ने बताए ।
मृतक चौधरीका बुवा, आमा, डेढ वर्षीया छोरी, १९ वर्षीया पत्नी, ४ दाजु र एक भाइ छन् । एकजना दाजु जीतबहादुर चौधरी त नेपाल प्रहरीमै कार्यरत छन् ।
घरपरिवारले उपचारमा ढिलाई हुँदा विनोदको ज्यान बचाउन नसकेपनि आश्रति परिवारलाई उचित राहत, छोरीलाई निःशुल्क पठनपाठन र पत्नी अञ्जनालाई उचित रोजगारीको व्यवस्था गरिदिन सरकारसँग माग गरेका छन् ।
बिमा बापत १५ लाख, सरकारले राहत स्वरूप दिने भनेको १० लाख रुपियाँ तत्काल उपलब्ध गराउन मागसमेत गरे । यसैगरी टोलीले घटनामा घाइते भएकी तुलसीपुर उपमनपा-७ की २२ वर्षीया जेनी डिसी र ४० वर्षीया देवा डिसीका आफन्त देवबहादुर वलीसँग पनि भेट गरी घाइतेको अवस्थाका बारेमा जानकारी लिएको थियो ।
घाइतेहरूका परिवारले पीडितको उपचार खर्च व्यहोर्ने भनिएपनि हाल उपचार खर्च परिवार र आफन्तहरूले नै व्यवहोर्नुपरेको बताए ।
यसैगरी इन्सेक टोलीले दाङकी प्रहरी प्रमुख एसपी दुर्गा सिंहसँग भेट गरी समग्र जिल्लाको सुरक्षा अवस्था, चुनावी सुरक्षा, तुलसीपुर बम विष्फोटको घटनाको बारेमा जानकारी लिएको थियो । एसपी सिंहले घटनामा एक म्यादी प्रहरीको मृत्यु भएको, अर्का एक जना घाइते भई उपचारपश्चात डिस्चार्ज भएको तीन जनाको ललितपुरको बि एण्ड बि र एक जनाको युनाइटेड अस्पताल नेपालगञ्जमा उपचार भइरहेको जानकारी दिएकी थिइन् ।
साथै थप तीन जनाको उपचार राप्ती अञ्चल अस्पतालमा भएपछि घर फर्किसकेको जानकारी दिइन् । उनले घटनाको जिम्मेवारी कसैले नलिएको र घटनाको अनुसन्धान भइरहेको बताइन् । सो अवसरमा टोलीले घटनामा ज्यान गुमाएका परिवारलाई उचित राहत उपलव्ध गराइ घाइतेहरूको उपचारमा ध्यान दिन आग्रह गरेको थियो ।
यस्तै इन्सेक टोलीले तुलसीपुर उपमहानगरपालिकाका प्रमुख घनश्याम पाण्डेसँग भेट गरेको थियो । भेटमा पाण्डेले घटनामा परी ज्यान गुमाएका विनोद चौधरीकी डेढ वर्षीया छोरी प्रमिशाको माध्यमिक तहसम्म निशुल्क शिक्षा प्रदान गर्ने र २५ हजार रुपियाँ किरीया खर्च दिने बताएका थिए ।