मङ्सिर १३ गते बिहान अज्ञात समूहले थापेको एम्बुसमा परी गम्भीर घाइते भएका नेपाली काङ्ग्रेस उदयपुरका उम्मेदवार नारायणबहादुर कार्कीसहित दुई जनालाई थप उपचारका लागि हेलिकोप्टरमार्फत काठमाडौँ लगिएको छ ।
मध्यान्न १२:३० बजे उम्मेदवार कटारी नगरपालिका-७ रिस्कुका कार्की र गम्भीर घाइते उदयश्री वहुमूखी क्याम्पस कटारीकी नेविसङ्घका सभापति कटारी-३ की २३ वर्षीया मीरा कटुवाललाई हेलिकोप्टरमार्फत काठमाडौँ लगिएको हो ।
विष्फोटनमा परी उदयपुरगढी गाउँपालिका-८ की धनमाया धौलाकोटी, चालक कटारी नगरपालिका-७ रिस्कुका ३६ वर्षीय राजन कार्की, प्रहरी जवान कालिदास श्रेष्ठ घाइतेको नेपालटारस्थित स्वास्थ्य क्लिनिकमा उपचार भइरहेको जिल्ला प्रहरी कार्यालयका डिएसपी मेघराज अधिकारीले जानकारी दिए ।
उम्मेदवार कार्कीलाई लक्षित गरी अज्ञात समूहले मङ्सिर १३ गते बिहान थापेको एम्बुस विष्फोटन हुँदा बा.१.च. ७८०६ नम्बरको सेतो बोलेरो जिपमा सवार उम्मेदवारसहित पाँच जना घाइते भएको डिएसपी अधिकारीले बताए । एम्बुसमा परी जिप सडक किनारामा पल्टिएको छ ।
प्रमुख जिल्ला अधिकारी चन्द्रमान श्रेष्ठका अनुसार कार्कीको एउटा हात चलेको छैन भने आँखालेसमेत काम गरेको छैन । उनको शरीरका सबैजसो भागमा चोट लागेको स्थानीय बोधकुमार घिमिरेले बताए । घाइते कटुवालको एउटा गोडाको कुर्कुचा मुनीको भाग नै नरहेको जनाइएको छ ।
उदयपुरगढी गाउँपालिका-६ नेपालटार बजारमा आयोजना गरिएको चुनावीसभालाई सम्बोधन गर्न जाँदै गरेका प्रतिनिधिसभा-२ का काङ्ग्रेसका उम्मेदवार कार्कीलाई लक्षित गरी सोही वडाको दनुवारबेसीमा थापिएको एम्बुस विष्फोट भएको हो । कार्की २०७० सालमा क्षेत्र नं ३ बाट निर्वाचित सांसद हुन् ।
