जिल्ला प्रशासन कार्यालयले ‘क’ वर्गका अपाङ्गता भएका रेसुङ्गा नगरपालिका–७ का १७ वर्षीय बालकलाई माघ १८ गते घरमै पुगेर नागरिकता वितरण गरेको छ ।
रेसुङ्गा नगरपालिकाका नगरप्रमुख खिलध्वज पन्थी र प्रमुख जिल्ला अधिकारी जनार्दन गौतमले संयुक्त रुपमा बालकलाई नागरिकता प्रदान गर्नुभएको हो । उहाँ २०६४ फागुन १७ गते जन्मिनु भएको थियो । जन्मिएको दुई वर्षमा शरीर चल्न छोडेको थियो । बिरामी परेर पूर्ण अशक्त भएपछि बिस्तारामै दिसा पिसाब गराउने गरिएको आमा गोमा मरासिनीले बताउनु भयो । उहाँका दुई छोरा एक छोरी छन् । कान्छो छोरा सानैबाट अपाङ्ग भएपछि आफूले नै सबै स्याहारसुसार गरे पनि नागरिकता बनाउन बोकेर प्रशासन जान नसकेको बताउनु भयो । प्रशासन घरमै आएर छोरालाई नागरिकता दिएपछि गोमा निकै खुसी हुनुभयो । ‘छोराको अपाङ्गताले निकै पीडा दियो । म बाँचुन्जेल सेवा गर्छु । छोराले नागरिकता पाउँदा राहात र घरमै सरकार भएको महसुस गरेँ ’ – उहाँले भन्नुभयो । जिल्ला प्रशासन कार्यालयका प्रमुख जिल्ला अधिकारी जर्नादन गौतमले अपाङ्गता भएर अनागरिक कोही पनि हुन नपर्ने बताउनु भयो । उहाँले सूचना पाएसम्म प्रशासन घरमै पुगेर नागरिकता प्रदान गरिरहेकाले सहजीकरणको लागि सबैलाई आग्रह गर्नुभयो ।
रेसुङ्गा नगरपालिकाका मेयर खिलध्वज पन्थीले आफूहरूले पञ्जिकरणका अधिकांश काममा नागरिकाई घरदैलोमै सेवा प्रदान गरिरहेको बताउनु भयो । जिल्ला प्रशासन कार्यालयले इन्सेककै पहलमा पनि थुप्रै अपाङ्गता भएका व्यक्तिहरूलाई घरमै पुगेर नागरिकता प्रदान गरेको छ ।
