अनौपचारिक क्षेत्र सेवा केन्द्र (इन्सेक) का अध्यक्ष सुबोधराज प्याकुरेलले मुलुकको सत्तामा गणतन्त्र आएपनि नागरिकले त्यसको अनुभूति गर्न नपाएको बताएका छन् ।
जागरण नेपालले सुनसरीको सदरमुकाम इनरुवामा भदौ ६ गते आयोजना गरेको सरोकारवालासँगको छलफल कार्यक्रममा अध्यक्ष प्याकुरेलले राज्यले दायित्व पूरा गर्न नसकेकाले नागरिकले गणतन्त्र आएको अनुभूति गर्न नपाएको बताएका हुन् । संविधानले दिएका अधिकार नागरिकले प्राप्त गर्न नसकेको भन्दै उनले नागरिकको स्तरबाट उठेको चेतना र केन्द्रबाट दिइने सन्देश साझा नहुञ्जेलसम्म नागरिकका अधिकार कागजमा मात्र सीमित हुने बताए ।
उनले समाज विकासको क्रममा कुनै पनि सिद्धान्त लागु नहुने बताए । समाज विकासको गतिमा अगाडि बढेको र राज्यले त्यस अनुसारको प्रत्याभूति गर्न नसकेको भन्दै नागरिको तर्फबाट सधैं अधिकारका लागि लडनु पर्ने अवस्था रहेको उनको भनाइ थियो । सरकार र गैरसरकारी संस्थाहरूको साझा एजेण्डा भएमात्र नागरिकका अधिकारहरू चाँडै स्थापित हुने उनले बताए ।
कार्यक्रममा जागरण नेपालकी अध्यक्ष शर्मिला कार्कीलगायतले सुनसरीको मानव अधिकार र महिला समावेशीकरण र राजनीतिमा महिलाको सहभागिताका बारेमा छलफल गरेका थिए ।