चन्दननाथ नगरपालिका भित्र रहेको एकमात्र चन्दननाथ गुरूकुल पाठशालाका बालबालिकाले शैक्षिक सत्र सुरू भएको आठ महिना बितिसक्दा पनि पाठ्यपुस्तक नपाएको गुनासो गरेका छन् ।
उक्त गुरूकुल पाठशालाका प्रद्यानाध्यापक विश्वराज उपाध्यायले शैक्षिक सत्र सुरू भएको पहिलो हप्तामा पाठ्यपुस्तक माग गरिएपनि आठ महिना बितिसक्दा पनि अहिलेसम्म प्राप्त नभएको बताए । उनले भने-‘पाठ्यपुस्तक नभएपछि बालबालिकाको पठनपाठनमा प्रभावित भएको छ । यस विषयमा पटकपटक जिल्ला शिक्षा कार्यालयसँग अनुरोध गर्दा पनि सुनुवाइ भएन ।’
प्रधानाध्यापक उपाध्यायले भने अहिले गुरूकुल पाठशालामा कक्षा तीनसम्म पठनपाठन भइरहेको छ । दुई कक्षासम्मका बालबालिकाले पुराना पाठ्यपुस्तक अध्ययन गरिरहेका छन् तर तीन कक्षाका बालबालिकाले भने पाठ्यपुस्तक नपाएकाले पठनपाठनमा समस्या भएको हो ।
कर्णालीमा फागुन महिनादेखि शैक्षिक सत्र सुरू हुने गरेपनि भदौ महिनाको अन्तिम हप्तासम्म पनि पाठ्यपुस्तक बालबालिकाले प्राप्त गर्न सकेका छैनन् ।
चन्दननाथ गुरूकूल पाठशालामा अहिले १५ जना छात्रा र २५ जना छात्र गरी ४० जना बालबालिका अध्ययन गरिरहेका छन् । उक्त पाठशालामा गुरूकुल सामाजिक, संस्कृत रचना, संस्कृत भाषा, गुरूकुल नेपाली विषय पठनपाठन भइरहेको छ ।
जिल्ला शिक्षा अधिकारी कुलबहादुर फडेराले पाठ्यपुस्तक माग गरेपनि समयमा प्राप्त नभएको बताए । उनले भने समयमा विभागदेखि पाठ्यक्रम विकास केन्द्रमा जानकारी गराएपनि पाठ्यपुस्तक प्राप्त नभएका कारण समस्या भइरहेको छ । ‘पाठ्यपुस्तक खरिदका लागि विद्यालयलाई निकासा दिएका छौँ । उनीहरूले पनि व्यवस्थापन गर्न सक्छन् ।’-जिशिअ फडेराले भने ।