महिलामाथि हुने हिंसाका घटना कम गर्न स्रोतसाधनमा महिलाको पहुँच बढाउनुपर्नेमा ललितपुरमा फागुन २४ गते आयोजित अन्तरक्रिया कार्यक्रमका सहभागीले जोड दिएका छन्।
अन्तर्राष्ट्रिय महिला दिवसको पूर्वसन्ध्यामा इन्सेक र राष्ट्रिय मानव अधिकार आयोगले संयुक्त रूपमा आयोजना गरेको ‘महिला तथा बालिकामाथि हुने हिंसा न्यूनीकरण’ सम्बन्धी अन्तर्क्रियामा सहभागीले सो विषयमा जोड दिएका हुन् ।
कार्यक्रममा राष्ट्रिय मानव अधिकार आयोगका अध्यक्ष तपबहादुर मगरले मानव अधिकार र न्यायिक प्रक्रियाबारे समाजमा सचेतना फैलाउन आवश्यक रहेको बताउनु भयो । उहाँले घरपरिवार र आफन्तबाटै महिला र बालिका पीडित हुने गरेका घट्ना सार्वजनिक भएकामा चिन्ता व्यक्त गर्नु भयो ।
कार्यक्रममा मानव अधिकार आयोगकी सदस्य लिली थापाले विभेद अन्त्य गर्न महिलाको हातमा शक्ति पुर्याउनुपर्ने बताउनु भयो । उहाँले महिलाको क्षमता र दक्षता बढाउन लगानी गर्नुपर्नेमा जोड दिनु भएको छ । आयोगका सदस्य मनोज दवाडीले साधनस्रोतमा महिलाको पहुँच बढाउनुपर्ने बताउनु भएको छ ।
कार्यक्रममा इन्सेकका अध्यक्ष डा. कुन्दन अर्यालले पीडितको संरक्षणमा संवैधानिक आयोगहरूले ध्यान दिन जरुरी रहेको बताउनु भयो । उहाँले पीडित महिला र बालिकासँग सम्बन्धित घटनाबारे जानकारी दिँदा गोपनियतालाई ध्यान दिनुपर्नेमा सो हुन नसकेको बताउनु भयो ।
‘पीडितको नाम ठेगाना त गोप्य राख्नु पर्नेमा फोटो नै सार्वजनिक हुँदा पीडित र पीडितका परिवारलाई थप पीडा हुन्छ । यतातिर सरोकारवाला सबैको ध्यानाकर्षण गराउँछु ।’-अध्यक्ष अर्यालले भन्नु भयो ।
इन्सेकका कार्यकारी निर्देशक विजयराज गौतमले समाज सुधारका लागि महिला अधिकार प्रभावकारी हुने बताउनु भयो । कार्यक्रममा सन् २०२३ मा इन्सेकले अभिलेख गरेका महिला र बालिका पीडित भएका घटनाका तथ्य र तथ्याङ्कबारे जानकारी गराइएको थियो ।
सन् २०२३ मा बेचबिखन तथा ओसारपसारका घटनामा ३० जना, बेचबिखन तथा ओसारपसार प्रसासका घटनामा २५ जना, घरेलु हिंसाका घटनामा ४ हजार ९ सय ६३ जना, ‘बोक्सी’को आरोपका घटनामा २५ जना, बलात्कारका घटनामा ६ सय ५१ जना, बलात्कार प्रयासका घटनामा १ सय ५२ जना, यौन दुर्व्यवहारका घटनामा ५४ जना महिला पीडित भएको अभिलेख भएको इन्सेकले फागुन २४ गते जारी गरेको प्रतिवेदनमा उल्लेख छ ।
इन्सेकले गरेको अभिलेख अनुसार सन् २०२३ मा १ हजार ४ सय ४६ जना बालिका पीडित भए । जसमध्ये बलात्कारका घटनामा १ हजार २ जना, यौन दुर्व्यवहारका घटनामा ३ सय ७३ जना, बेचबिखन तथा ओसारपसारका घटनामा ४३ जना र बाल विवाहका घटनामा २८ जना बालिका पीडित भएको अभिलेख भएको कार्यक्रममा जानकारी दिइएको छ ।
‘महिलामा लगानीः सभ्य र समुन्नत समाजको थालनी’ भन्ने मूल नाराका साथ १ सय १४ औँ अन्तर्राष्ट्रिय महिला दिवस विविध कार्यक्रम गरी देशभर मनाइँदै छ । हरेक वर्ष मार्च ८ का दिन विश्वभर यो दिवस मनाउने गरिएको छ ।
११४ औँ अन्तर्राष्ट्रिय महिला दिवसको अवसरमा इन्सेकले जारी गरेको प्रतिवेदन पढ्न यहाँ क्लिक गर्नुहोला
