द्वन्द्वमा बेपत्ता हुनुभएका आफ्नो बुबाको २४ वर्ष बित्दा पनि अवस्था बारे सार्वजनिक नहुँदा बुबाको पीरले आफूहरू चिन्तित भएको भरतपुर महानगरपालिका-१२ स्थित आस्था टोलकी बेपत्ता पारिएका व्यक्तिका परिवार ४१ वर्षीया निशा न्यौपानेले बताउनु भयो ।
गीतानगर गाविस-२ निवासी ५३ वर्षीय दण्डपाणि न्यौपानेलाई ०५६ जेठ ७ गते काठमाडौँको सुन्धाराबाट नेपाल प्रहरीले गिरफ्तार गरी बेपत्ता बनाएको थियो । पीडितको बारे हालसम्म कुनै थप जानकारी प्राप्त हुन सकेको छैन । तत्कालिन समयमा राज्य पक्षले बेपत्ता पारेको तर बुबाको अवस्था के हो भन्ने यथार्थ जानकारी नहुँदा परिवारजन अन्यौलमै रहेको बेपत्ता पारिएका दण्डपाणिकी छोरी निशा न्यौपानेले बताउनु भयो ।
विद्रोही माओवादीका व्यक्ति रहेको भनि तत्कालिन राज्य पक्षले गिरफ्तार गरी लगेको आफ्नो बुबा एक दिन फर्केर घर आउने आशामा आफूहरू बाँचेको निशाको भनाइ छ । तर धेरै समय बित्यो, बुबाको खबर नपाउँदा आफूहरू निकै चिन्तित भएकोले बेपत्ता बुबाको खोजिको लागि पहल गरिदिन निशाले इन्सेकलाई आग्रह समेत गर्नुभयो ।
आफ्नो बुबाको खोजिका लागि बेपत्ता आयोग लगायत विभिन्न ठाउँमा विभिन्न मितिमा निवेदन दिए पनि खोजी नभएको निशा न्यौपानेको गुनासो छ । बुबा बेपत्ता नै हो की अन्य केही भइसकेको हो भन्ने अन्यौलताका कारण आफूहरूले बेपत्ता परिवारको परिचय पत्र समेत नलिएको उहाँको भनाइ छ । बेपत्ता आयोग बने पनि उहाँ लगायत थुप्रै नागरिकको अवस्था अझै अज्ञात छ । बेपत्ता आयोगमा आफूहरूले २०७४ सालमा बुबाको अवस्था बारे जानकारी लिन निवेदन दिएको तर आधिकारिक सूचना र यथार्थ जानकारी नपाएको उहाँले इन्सेकलाई जानकारी दिनुभयो ।
‘राज्य पक्षबाट हामीले केही मागेका छैनौँ केवल बुबाको अवस्था बताइदेउ हामी परिवारजन ढुक्क भएर बस्छौँ भनेका हौँ । बुबाको अज्ञात अवस्थाका कारण परिवारका सदस्यहरूमा मानसिक तनाव हुने गरेको छ’, निशाले भन्नुभयो ।
बेपत्ता परिवारको अवस्था बारे जानकारी लिन ०८० कात्तिक २१ गते इन्सेक बागमती प्रदेशका प्रलेख अधिकृत सोम नेपाली र इन्सेक जिल्ला प्रतिनिधि बेपत्ता परिवार निशा न्यौपानेको घर पुग्दा उहाँले बुबाको पीरले आफूहरू चिन्तित भएको बताउनु भएको हो ।