स्वास्थ्य तथा जनसङ्ख्या मन्त्रालयले वैशाख १३ गते देशभरका सबै सरकारी, निजी, सामुदायिक अस्पताल, प्रतिष्ठान तथा मेडिकल कलेजहरूलाई विपन्नहरूको निशुल्क उपचार अनिर्वाय गराउन परिपत्र गरेको छ ।
संविधान २०७२ ले धारा ३५ मा स्वास्थ्य सम्बन्धी हकलाई व्यवस्था एवम् व्याख्या गरेको छ । सोही धाराको उपधारा २ मा प्रत्येक नागरिकलाई स्वास्थ्य सेवामा समान पहुँचको हक हुनेछ भनि उल्लेख गरिएको छ ।
तर, धनकुटा नगरपालिका–२ भीरगाउँका १७ वर्षीय विवेक राई आर्थिक अभावका कारण उपचारबाट वञ्चित हुनु भएको छ ।
विपन्न भएका कारण विवेक राई डेढ महिनायता थलिएर ओछ्यान पर्नु भएको छ । ०७९ चैत ११ गते धान कुट्ने मिलको मेसिनले अण्डकोष छुट्टिएपछि अस्वस्थ्य हुनु भएका राई उपचार खर्च अभावमा उपचार गर्न नसकी घरमै बस्न बाध्य हुनु भएको छ ।
आफन्त र मिल सञ्चालक रमेश थापाको सहयोगमा सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा प्रारम्भिक उपचार गरिएपनि रकम अभावका कारण शल्यक्रिया हुन सकेको छैन ।
पीडित राई हाल धनकुटा नगरपालिका–५ बालमन्दिरस्थित बडीआमा धनकुमारी राईको घरमा बसिरहनु भएको छ ।
प्रारम्भिक उपचारका १ लाख ५० हजार रुपियाँ खर्च गरेर फर्किएका राईको छुट्टिएको अण्डकोष जोड्न अर्को अप्रेशन गर्नु पर्ने सो अप्रेशनका लागि आर्थिक अभाव भएपछि विवेकलाई घरमै राखेको धनकुमारी राईले बताउनु भयो ।
छथर जोरपाटी गाउँपालिका–४ का ३५ वर्षीय रमेश थापाले सञ्चालन गरेको कुटानी पिसानी मिलमा सहयोगीको रूपमा काम गर्ने राई चैत ११ गते दुर्घटनामा पर्नु भएको थियो ।
घाइते राईकी आमा निशा राईको ११ वर्ष अघि नै मृत्यु भइसकेको छ भने बुबा हर्कबहादुर राई १४ वर्षदेखि परिवारको सम्पर्कमा हुनुहुन्न ।
‘छुट्टिएको अण्डकोष जोड्न कति खर्च लाग्छ डाक्टरले पनि भन्न सकेका छैनन् ।’ मिल सञ्चालक थापाले भन्नुभयो–‘उपचारमा लागेको आधा रकम मैले व्यहोर्ने भनेको छु तर कति लाग्छ थाहा छैन ।’ अहिलेसम्म २ लाख रुपियाँ खर्च भइसकेको छ ।
छथर जोरपाटी गाउँपालिका–८ का वडाध्यक्ष रसबहादुर राईले स्थानीय तहले गरिवको उपचार गर्नुपर्ने भएपनि हालसम्म गाउँपालिकाबाट त्यस किसिमको कार्यविधि नबन्दा समस्या भएको बताउनु भएको छ ।
