लोकतान्त्रिक देशमा हुने निर्वाचन गतिविधिमा भयरहित वातावरणमा मत हाल्न पाउनु मानव अधिकारको विषय भएको राष्ट्रिय मानव अधिकार आयोगका सदस्य मिहिर ठाकुरले बताउनु भएको छ ।
निष्पक्ष वातावरणमा मत हाल्न पाउनु नागरिकको अधिकार भएकाले कोही कसैले पनि डर, धाक, धम्की दिन नहुने उहाँको भनाइ छ ।
सामाजिक सञ्जालमा एकअर्का पार्टी प्रति लक्षित गरी अपशब्द प्रयोग भएको भन्दै उहाँले सञ्जालमा देखिएको मतभेद मतदानको क्रममा देखिएमा दुर्भाग्य हुने भन्दै उहाँले संयम हुन आवश्यक रहेको बताउनु भयो ।
चितवनका पत्रकारहरूसँग उपनिर्वाचनको पूर्व सन्ध्यामा छलफल गर्दै आयोगका पूर्व सदस्य तथा इन्सेकका संस्थापक अध्यक्ष शुशील प्याकुरेलले निर्वाचनलाई स्वच्छ र संयमित बनाउन सबैको भूमिका उत्तिकै हुने बताउनु भयो ।
जनमतलाई कसैले पनि अपमान गर्न नहुने भन्दै उहाँले हरेक नागरिकले स्वतन्त्र हिसाबले आफ्नो मत खसाल्ने अधिकार प्रयोग गर्न पाउनुपर्नेमा जोड दिनुभयो ।
जिम्मेवार निकायहरू जवाफदेहि नहुनाले विभिन्न घटनाहरूले प्रश्रय पाएको उल्लेख गर्दै उहाँले निर्वाचनको समयमा हुने सोधपुछ वा आचारसंहिता अनुगमनका कामहरू जवाफदेहिता सहितको हुनुपर्ने उहाँको भनाइ छ ।
चितवन क्षेत्र नं. २ मा वैशाख १० गते उप चुनाव हुँदैछ । एक प्रतिनिधिसभा सांसदका लागि २२ जना उम्मेदवार प्रतिस्पर्धामा छन् ।
कार्यक्रममा बोल्दै राष्ट्रिय मानव अधिकार आयोगका बागमती कार्यालय प्रमुख यज्ञ अधिकारीले राजनैतिक दल, कार्यकर्ता र उम्मेदवारहरू जिम्मेवार भएको अवस्थामा जनताले भयरहित वातावरणमा मताधिकार प्रयोग गर्न पाउने बताउनु भयो ।
नेपाल पत्रकार महासङ्घ चितवनका अध्यक्ष नारायणप्रसाद अधिकारीले नागरिकको अभिव्यक्ति स्वतन्त्रताको हकमा नै अवरोध हुने गरी सामाजिक सञ्जालमा व्यक्त भावनाहरूले पत्रकारिता जगतमा पनि डर पैदा भएको बताउनु भयो ।