राजविराज नगरपालिका–३ की २५ वर्षीया आरती दासमाथि घरेलु हिंसा गरेको आरोपमा उहाँका पति २८ वर्षीय नविनकुमार दासलाई प्रहरीले फागुन २९ गते गिरफ्तार गरेको छ ।
पीडितलाई ०७९ माघ २३ गते उनका पतिसहित ससुरा ६२ वर्षीय घन्सी भनिने घनश्याम दास, निजकी पत्नी ५८ वर्षीया राजकुमारी देवी दास, निजका छोरीहरू ३८ वर्षीया आशादेवी दास र २६ वर्षीया नितु दासले विवाह पश्चात दाइजो माँग गरी कुटपिट समेत गरेको भन्दै फागुन ४ गते जिल्ला प्रहरी कार्यालयमा उजुरी दिनुभएको थियो । जिल्ला प्रहरी कार्यालयले ०७९ फागुन ४ गते विवाह सम्बन्धी कसूरमा उजुरी दर्ता गरेको छ ।
पीडित र नविनको सामाजिक परम्पराअनुसार ०७७ मङ्सिर २१ गते विवाह भएको थियो । जग्गा किन्नका लागि आरोपितहरूले मागेको थप ५० लाख रुपियाँ नदिएपछि शारीरिक, मानसिक र आर्थिक यातना दिएको पीडितले बताउनु भयो । पीडितका अनुसार आरोपित पतिले सम्बन्ध विच्छेद गरी दोस्रो विवाह गर्ने धम्की दिएका छन् ।
सप्तरी जिल्ला अदालतमा पीडितले ०७९ जेठ २७ गते घरेलु हिंसाको उजुरी दर्ता गरेकोेमा जिल्ला अदालतले जेठ ३० गते आरोपितहरूका नाममा अन्तरिम संरक्षणात्मक आदेश जारी गरेपछि पीडित घर प्रवेश गरेकी थिइन् । पतिले अन्तरिम संरक्षणात्मक आदेश बदर गर्न दिएको निवेदन खारेज भएपछि आरोपितहरूले कुटपिट गरेको पीडितले बताउनु भयो ।