अनौपचारिक क्षेत्र सेवा केन्द्र (इन्सेक) गण्डकी प्रदेश कार्यालयको अनुगमनको प्रभावले पर्वत जिल्ला कारागारमा रहेका महिला कैदीबन्दीले सेनेटरी प्याड प्रयोग गर्न थालेका छन् ।
मङ्सिर १ गते गरिएको अनुगमनका क्रममा महिला कैदीबन्दीहरूले इन्सेकको टोलीसमक्ष महिनावारीको समयमा प्रयोग गर्ने सेनेटरी प्याड प्रयोग गर्न नपाएको गुनासो गरेका थिए ।
इन्सेक गण्डकी प्रदेश कार्यालय पोखराका संयोजक शिव खकुरेलसहितको टोलीसमक्ष बन्दी महिला मिना क्षेत्रीले सेनेटरी प्याड प्रयोग गर्न नपाएको गुनासो गरेपछि तत्काल स्थानीय कारागार प्रशासनसमक्ष गुनासो समाधानका लागि अनुरोध गरिएको थियो ।
कारागारकी जेलर शिला श्रेष्ठले इन्सेकको अनुरोध अनुसार महिलाहरूलाई सेनेटरी प्याड उपलब्ध गराइएको बताउनु भयो ।
उहाँले सेनेटरी प्याड व्यवस्थापनमा समस्या देखिएकाले महिलाहरूलाई लामो समयदेखि उपलब्ध नगराइएको तर खाडल खनेर व्यवस्थापन गर्ने गरी सेनेटरी प्याड उपलब्ध गराइएको बताउनु भयो । पर्वत कारागारमा चार जना महिला कैदीबन्दी रहेका छन् ।
