कनकासुन्दरी गाउँपालिका–४ हाटसिंजास्थित हिमा नदीको बीच टापुमा रहेको स्वास्थ्य चौकीमा जाने काठेपुल बाढीले बगाएपछि सेवा लिन समस्या भएको छ । त्यहाँ पुग्ने काठेपुल बाढीले बगाएपछि सेवाग्राही प्रभावित भएको हुन् । नदीमा पानीको बहाव बढेकाले पुल बनाउन सकिने अवस्था छैन ।
असोज अन्तिमहप्तादेखि सेवाग्राहीले सेवा सुविधा लिन नपाएको गुनासो गरेका छन् । वरिपरि हिमा नदी बगेको छ । बीचमा सरकारी कार्यालयहरू बनाइएका छन् । बाढीले पुल बगाएपछि सरकारी कार्यालयहरूसँग जनसम्पर्क विच्छेद भएको वडाअध्यक्ष धनमानसिंह हमालले जानकारी दिनुभयो । नदीको बीच भागमा रहेको टापुमा सात ओटा सरकारी कार्यालय बनेका छन् ।
असोज महिनाको १९ गतेदेखि २३ गतेसम्मको अविरल वर्षाका कारणले कार्यालय जाने काठेपुल बाढीले बगायो । वडाध्यक्ष हमालले भन्नुभयोे, ‘जनप्रतिनिधि, कर्मचारी र सेवाग्राही जान सक्ने अवस्था नहुँदा सेवा लिनबाट बञ्चित छन् । पुल निर्माणको काम चाँडै पहल गर्नेछौँ ।’
उक्त टापुमा हाटसिंजा स्वास्थ्य चौकी, वडा नम्बर ४ को वडा कार्यालय, हाटसिंजा आधारभूत विद्यालय, आँखा उपचार केन्द्र, इलाका पशु सेवा कार्यालय, कृषि कार्यालय टापुमै बनेका छन् । अहिलेको जस्तै बाढी दोहोरिने अवस्था आएको खण्डमा सबै कार्यालय बग्न सक्ने खतरा रहेको छ ।
अहिले तत्काल सेवा उपलब्ध गराउनको लागि गाउँमै अस्थायी कार्यालय खोलिएका छन् । अहिले हाटसिंजा गाउँमा रहेको इलाका हुलाक कार्यालयमा रहेको एक कोठामा बसेर सिफारिस लगायतका काम सुरु भएका छन् । हाटसिंजा स्वास्थ्य चौकी इन्चार्ज वीरेन्द्रप्रसाद उपाध्यायले स्वास्थ्य चौकीमा समेत बिरामी लैजान नसकिने अवस्था आएको बताउनुभयो । उहाँले भन्नुभयोे, ‘स्वास्थ्यका लागि चाहिने औजार, उपकरण र औषधि स्वास्थ्य चौकीमै छन् । नदी तरेर जान सकिने अवस्था छैन । बिरामी गाउँमै छन् ।’ स्थानीय मानप्रसाद आचार्यको घरमा अस्थायी रुपमा स्वास्थ्य चौकी खोलेर काम चलाउ सेवा प्रदान भइरहेको छ ।
खोला बढेको र पुल बगाएको हुनाले सरकारी कार्यालयमा जान सकिने अवस्था छैन । तत्काल नदिमा ओहोरदोहार गर्न काठको (फट्के) लाप्को बनाउनको लागि ४० हजार रुपियाँ उपलब्ध गराएको पालिका अध्यक्ष दामोदरप्रसाद आचार्यले जानकारी दिनुभयो । उहाँले भन्नुभयोे, ‘बाढीले बितण्डा मच्चाएको छ । अब सामान्य अवस्थामा फर्कन समय लाग्छ ।’
गाउँमा काम चलाउ कार्यालय खोलेर भएपनि सेवा दिन निर्देशन गरिएको अध्यक्ष आचार्यले बताउनुभयो । पुल बगाएपछि सेवाग्राहीले सेवा पाउन सकेका छैनन् ।
