१२ वर्षीया बालिकालाई बलात्कार गरेको कसुरमा जिल्ला अदालतले राजगढ गाउँपालिका–२ कमलपुरका २० वर्षीय जिवनकुमार यादव भनिने रामजिवन यादवलाई १८ वर्ष कैद सजायको फैसला गरेको छ ।
जिल्ला न्यायाधीश लालकाजी श्रेष्ठको इजलाशले ०७९ असोज २८ गते १८ वर्ष कैद सजाय, ५० हजार रुपियाँ पीडितलाई क्षतिपूर्ति भराउने र २ हजार २ सय रुपियाँ फौजदारी कसुर पीडित राहत कोषमा जम्मा गर्न फैसला गरेको हो ।
बालिकालाई आरोपितले ०७७ वैशाख ३ गते बलात्कार गरेको भन्दै पीडितका दाजुले जिल्ला प्रहरी कार्यालयमा ०७७ वैशाख ४ गते उजुरी दिएका थिए ।
जिल्ला प्रहरी कार्यालयले वैशाख ४ गते उजुरी दर्ता गरी सोही दिन पीडितको राजविराजस्थित गजेन्द्रनारायण सिंह अस्पतालमा स्वास्थ्य परीक्षण गराएको थियो ।
सौच गर्न राति घर बाहिर निस्किएका बेला यादवले जवरजस्ती नियन्त्रणमा लिई नजिकैको पोखरीको डिलमा रहेको चौरमा लगी बलात्कार गरेको पीडितले बताउनु भयो । मौखिक उजुरीका आधारमा प्रहरीले यादवलाई वैशाख ३ गते गिरफ्तार गरेको थियो ।
जिल्ला अदालतमा ०७७ वैशाख २४ गते अभियोजन पत्र दायर भएकोमा न्यायाधीश राजेन्द्रकुमार श्रेष्ठको आदेशमा आरोपित यादव वैशाख २९ गतेदेखि पुर्पक्षका लागि राजविराज कारागारमा थुनामा छन् ।