चौरजहारी नगरपालिका–१२ सानाखोलामा रहेको जनकल्याण माध्यमिक विद्यालयको दुई कोठे भवन निर्माणमा गत वर्ष काम गरेका कामदारहरूले हालसम्म पनि पारिश्रमिक नपाउँदा मर्कामा परेका छन् ।
आर्थिक वर्ष २०७७/०७८ मा उक्त विद्यालयमा चौरजहारी नगरपालिकाबाट दुई कोठे भवन निर्माणका लागि १३ लाख रुपियाँ बजेट विनियोजन भएको थियो ।
उक्त भवन निर्माण गर्नका लागि जिम्मा लिएका ठेकेदार महेन्द्र नेपालीसँग कामदारका तर्फबाट मोतीराम आचार्य र श्यामप्रसाद शर्माले भवन निर्माणको सम्झौता समेत गर्नुभएको थियो ।
कामदारहरू मोतीराम आचार्य, श्यामप्रसाद शर्मा, कृष्णबहादुर नेपाली, निराजन आचार्य, भिमलाल शर्मा, टेकबहादुर खत्री, रामलाल शर्मा, आश्मण शर्मा र झुपे खत्रीले काम गरेको कूल पारिश्रमिक रकम २ लाख १६ हजार रुपियाँ नपाएको उहाँहरूले इन्सेक प्रतिनिधिलाई जानकारी दिनु भयो ।
ठेकेदारसँग बारम्बार पैसा माग्दा समेत नदिएको तर ठेकेदारले भने नगरपालिकाबाट गत वर्ष नै सबै बजेट भुक्तानी ल्याइसकेको पीडित कामदार रामलाल शर्माको आरोप छ ।
पारिश्रमिक नपाएको गुनासो गरेपछि २०७९ असारमा जिल्ला प्रशासन कार्यालयमा ठेकेदार र कामदारबिच छलफल गराएकोमा ठेकेदार महेन्द्रले तत्काल पारिश्रमिक दिने प्रतिबद्धता जनाएको प्रमुख जिल्ला अधिकारी परमानन्द घिमिरेले जानकारी दिनु भयो ।
त्यस्तो प्रतिबद्धता जनाएपनि हालसम्म त्यसको कार्यान्वयन नभएको पीडित कामदारहरूको गुनासो रहेको छ ।