कालीमाटी गाउँपालिकाको पैयाकाँडा–कोछट्टे सडक निर्माण गर्ने क्रममा डोजरले खानेपानीको पाइप काटेर क्षति बनाएपछि करिब पाँच महिनादेखि स्थानीयलाई खानेपानीको अभाव भएको छ ।
सडक निर्माण गर्ने क्रममा डोजरले गत फागुनको अन्तिममा खानेपानी योजनाका पाइप काटेर क्षति बनाएपछि स्थानीयवासीहरू घर नजिकैको धाराको पानी खानबाट वञ्चित भएको स्थानीय ३५ वर्षीया शोभा डाँगीले बताउनुभयो ।
काटिएको पाइप जडान गर्ने सम्बन्धमा पालिकाले बेवास्ता गरेका कारण बस्तीका २२ घरपरिवार प्रभावित बनेको उहाँले बताउनुभयो । एक गाग्री पानीका लागि करिब दुई घण्टा हिडेर पुराना कुवा धाउन बाध्य छन्, उहाँले भन्नुभयो, लामो समय हिँडनु पर्दा स्थानीयलाई सास्ती भएको छ ।
पानीकै समस्याका कारण समयमै खाना खान नपाएर बालबालिकाहरू नियमित विद्यालय समेत जान नसकेको उहाँले बताउनुभयो । सरसफाईमा समेत कठिनाइँ हुँदा उनीहरू फोहर कपडा लगाएर विद्यालय जान बाध्य भएको अभिभावकहरूको भनाई छ ।
डोजरले काटेर तहसनहस बनाएको पाइप पुनः जडानका लागि पालिका र खानेपानी कार्यालयमा बारम्बार आग्रह गर्दै आएको र निवेदन दिए पनि सम्बन्धित निकायबाट अहिलेसम्म जडान हुन नसक्दा पानीका लागि स्थानीयले धेरै कष्ट उठाउनु परेको स्थानीय थम्मन बहादुर घर्तीले बताउनुभयो ।
घर नजिकैको धारामा पानी भर्न बानी परेका स्थानीय अझ बढी समस्यामा परेको उहाँले बताउनुभयो । उहाँका अनुसार आर्थिक वर्ष ०४५ सालमा एडीबीको एक करोड रुपियाँभन्दा बढी अनुदानमा बनेको खानेपानी योजना अहिले जीर्ण भएपछि धारामा नियमित पानी नआउने गरेपनि स्थानीयले घरपरिवार सङ्ख्याअनुसार बाँडेर पिउने गरेका थिए ।
अहिले बढ्दो गर्मीका कारण कुवामा समेत पानी सुक्दै गएकाले खोलाको प्रदुषित पानी पिउनुपरेको स्थानीयको भनाई छ । तहसनहस भएका पाइप फेर्नका लागि खानेपानी कार्यालयसँग सहकार्य भइरहेको कालिमाटी गाउँपालिकाका अध्यक्ष दानबहादुर खत्रीले बताउनुभयो ।
जिल्ला खानेपानी कार्यालय सल्यानका प्रमुख पदमराज देवकोटाले स्थानीयले माग गरेपछि सो पुरानो योजनाको जाँच गरेर प्राविधिक टोली फर्किसकेको र पाइप खरिदका लागि तयारी भइरहेको बताउनुभयो ।
