सरकारले बजेट भाषणमा कृषिमा आत्मनिर्भर हुने भनेर, आयात प्रतिस्थापन गर्ने भने पनि रासायनिक मल उपलब्ध नहुँदा जिल्लाका किसानलाई मकै उत्पादन नहुने चिन्ताले सताएको छ ।
रासायनिक मलको प्रयोग बिना मकै उत्पादन नहुने भएकोले यस पटक मकै खेती बिगे्रको कालिका गाउँपालिका–३ का किसान दुर्गा ढकालले बताउनु भयो ।
ढकाल जिल्लामा मल अभाव भएकोले यस वर्ष अनिकाल लाग्ने अवस्था आएको बताउनु हुन्छ ।
अर्का कृषक खेमराज न्यौपाने भन्नु हुन्छ– धान खेतीको समय पनि नजिकै छ मकै त बिग्रियो अब धान खेतीको लागि पनि रासायनिक मल अभाव हुने अवस्था आयो ।
उहाँ किसानले मलको सम्स्या उठाएको दुई महिना भयो अझै मल आपूर्ति नभएको गुनासो गर्नु हुन्छ ।
कृषि सामग्री कम्पनीले ८ सय ७७ रूपैयाँमा बेच्ने युरिया मल भारतीय सीमाबाट लकीछिपी ल्याएको एक बोरा मलको २ हजार ५ सय रुपियाँ पर्दछ ।
त्यो पनि पर्याप्त पाउन नसकेको कारण बालीमा हाल्न नपाएको किसानहरूले बताएका छन् ।
यो वर्ष रासायनिक मल नआएको कारण किसानहरू मारमा परेका हुन् । जिल्लामा रासायनिक मलको मागको एक चौथाई मल पनि पाप्त नभएको कारण किसानहरूले आफ्नो खेतीबालीमा मल हाल्न पाएका छैनन् ।
अहिले खेतबारीको मकैमा प्रयोग गर्न युरिया मलको माग उच्च रहेको छ । तर, जिल्लामा सहकारीमार्फत किसानलाई मल वितरण गरिरहेको नुवाकोटका कृषि सामग्री कम्पनी र साल्ट ट्रेडिङ कम्पनीको गोदाममा मल छैन ।
साल्ट ट्रेडिङले माघ महिना लागेपछि युरिया मल ल्याउन नसकिएको जनाएको छ ।
मल अभावले कृषि उत्पादन धेरै घट्ने र जिवीकामा समस्या हुने भएको किसान चिन्तामा परेका छन् ।