एकीकृत माओवादी केन्द्र अदानचुली गाउँपालिका हुम्लाका कार्यकर्ताले अदानचुली गाउँपालिका–३ फडेरा बाडा घर भएका अदानचुली गाउँपालिकाका अध्यक्ष ५२ वर्षीय दल फडेराको घरमा तोडफोड गरेको पीडितले आरोप लगाउनु भएको छ ।
उक्त पार्टीका कार्यकर्ताले चैत २६ गते अध्यक्ष फडेराको घरमा तोडफोड गरेको गाउँपालिका अध्यक्ष फडेराको आरोप छ ।
ठूलो सङ्ख्यामा जम्मा भएका माओवादी कार्यकर्ताले फडेराको घरमा ढुङ्गामुडा प्रहार गर्दा घरको माथिल्लो तलामा राखिएको सोलारमा क्षति भएको अध्यक्ष फडेराले आरोप लगाउनु भयो ।
चैत २५ गते राति अध्यक्ष फडेरा सहित नेकपा (एमाले) का कार्यकर्ताले एकीकृत माओवादी केन्द्र कार्यकर्ताको होटेल र पसलमा तोडफोड गरेकाले त्यसको जबाफ स्वरुप आफूले अध्यक्ष फडेराको घर घेरेको दावी माओवादी केन्द्रका कार्यकर्ता रनसिंह परियारको भनाइ छ ।
रातिको घटनालाई लिएर माओवादी केन्द्र अदानचुली गाउँ कमिटीले चैत २६ गते विज्ञप्ति जारी गरेको छ ।
घटना लगत्तै अध्यक्ष फडेराले श्रीनगर प्रहरीचौकीलाई उजुरी गरेपछि सोही दिन श्रीनगर प्रहरी चौकीबाट प्रहरीको टोली गएर घटनालाई साम्य बनाएको जिल्ला प्रहरी कार्यालयका डिएसपी कृष्ण ओझाले बताउनु भयो ।