फाकफोकथुम गाउँपालिका–१ का ३८ वर्षीय कृष्णकुमार खड्कालाई ०७८ चैत १८ गते मुक्का प्रहार गरेको आरोपमा प्रहरीले फाकफोकथुम गाउँपालिकाकी उपाध्यक्ष ४२ वर्षीया सरस्वती राई(सरू) लाई चैत २१ गते गिरफ्तार गरेको छ ।
गाउँपालिका उपाध्यक्ष तथा न्यायिक समिति संयोजक राईविरूद्ध पीडितले चैत २० गते जिल्ला प्रहरी कार्यालयमा उजुरी दिएपछि उपाध्यक्षलाई प्रहरी चौकीमा झिकाएको जिल्ला प्रहरी कार्यालयका एसपी महेन्द्रकुमार श्रेष्ठले बताउनु भयो ।
फाकफोकथुम गाउँपालिका–७ ठेगाना भएकी उपाध्यक्ष राईविरूद्ध कृष्णकुमार खड्काले चैत २० गते कुटपिट तथा अभद्र व्यवहार गरेको आरोपमा उजुरी दिएको एसपी श्रेष्ठले बताउनु भयो ।
पीडित पक्षको उजुरीका आधारमा उपाध्यक्ष राईलाई अनुसन्धानका लागि चैत २१ गते जिल्ला प्रहरी कार्यालयमा झिकाएको एसपी श्रेष्ठले बताउनु भयो ।
फाकफोकथुम गाउँपालिकाले मौसममी कामदार कोरिया पठाउने विषयमा छनौटमा नपरेका युवा र जनप्रतिनिधिबिच चैत १८ गते विवाद भएको थियो ।
सोही विवादका क्रममा कृष्णकुमार खड्काले मादक पदार्थ सेवन गरी अश्लील शब्दसहित गालीगलौच गरेपछि आफूले मुक्काले हिर्काएको उपाध्यक्ष राईको भनाइ छ ।