१७ वर्षीया बालिकालाई सामूहिक बलात्कार गरेको आरोपमा प्रहरीले रामारोशन गाउँपालिका–७ सुतारका २३ वर्षीय झपट भण्डारीलाई बाँके जिल्लाको नेपालगञ्ज उपमहानगरपालिका–१५ जमुनाहा सीमाबाट चैत १९ गते गिरफ्तार गरेको छ ।
आरोपित झपटलाई जमुनाहा सीमाबाट गिरफ्तार गरेर जिल्ला प्रहरी कार्यालय, अछाम ल्याइएको जिल्ला प्रहरी कार्यालय, अछामका इन्स्पेक्टर गङ्गादत्त बडुले इन्सेक प्रतिनिधिसँगको फोन सम्पर्कमा बताउनु भयो ।
मेला हेर्न गएकी बालिकालाई चैत ४ गते बिहान बालिकाको मोवाइल खोसेर रामारोशन गाउँपालिका–७ सुतारका २३ वर्षीय झपट भण्डारी र २२ वर्षीय रेवन्त भण्डारीसहित चार जनाले सामूहिक बलात्कार गरेको भन्दै पीडित पक्षले चैत ५ गते जिल्ला प्रहरी कार्यालयमा उजुरी दिएको थियो ।
घटनामा संलग्न झपट भण्डारीलाई गिरफ्तार गरिएको भएपनि अन्य तीन जना फरार रहेकाले खोजी कार्य जारी रहेको इन्स्पेक्टर बडुको भनाइ छ ।
बालिकाको स्वास्थ्य परीक्षण र उपचार चैत ६ गते जिल्ला अस्पतालमा गरिएको थियो ।