सप्तरीको विष्णुपुर गाउँपालिका–१ स्थायी घर भई विराटनगर महानगरपालिका–५ स्थित नोवेल अस्पतालमा कार्यरत २८ वर्षीय डाक्टर विजय यादवको हत्या भएको हुन सक्ने प्रहरीले आशङ्का गरेको छ ।
विराटनगर महानगरपालिका–५ स्थित प्रेम बस्नेतको घरमा डेरा गरी बस्दै आएका यादवको लास सोही घरको कम्पाउड वालभित्र मुखबाट रगत आएको र हातगोडामा चोट लागेको अवस्थामा चैत १९ गते फेला परेपछि हत्या भएको हुन सक्ने जिल्ला प्रहरी कार्यालयका डिएसपी दीपक श्रेष्ठले बताउनु भयो ।
अस्पतालका प्रबन्धक नारायण दाहालले डाक्टर यादव नोबेल अस्पतालको हाडजोर्नी तथा नशा रोग विभागमा कार्यरत मेडिकल अफिसर रहेको बताउनु भयो । डाक्टर यादव चार वर्षयता नोवेल अस्पतालमा कार्यरत रहेको अस्पतालका प्रबन्धक दाहालको भनाइ छ ।
डाक्टरको शङ्कास्पद तथा रहस्मय अवस्थामा लास फेला परेकाले प्रहरीले हत्याको आशङ्का गरेको र घटनाका विषयमा अनुसन्धान थालेको डिएसपी श्रेष्ठले बताउनु भयो । लास नजिक लाइटर र दुई ओटा जुत्ता फेला परेको प्रहरीले जनाएको छ ।
लास भेटिएको स्थानदेखि करिब एक सय मिटर पश्चिम नहर छेउ, नोबल हस्पिटलको गेटलगायतका विभिन्न स्थानहरूमा पनि रगत देखिएकाले घटना रहस्यमय रहेको प्रहरीको भनाइ छ ।
मृतकका आफन्तहरूले नियोजित रूपमा हत्या भएको भन्दै घटनाको निष्पक्ष छानविन गरी सत्यतथ्य बाहिर ल्याउन र दोषीलाई कारबाही गर्न माग गर्दै चैत १९ गते नोवेल अस्पताल परिसरमा नाराबाजी गरेका छन् ।
मृतकका मामा उपेन्द्र यादवले भान्जाको नियोजित तरिकाले हत्या गरेर डेरा नजिक ल्याएर फालेको हुनसक्ने बताउनु भयो ।
चैत १८ गते राति डाक्टर विजय यादव दुई जना साथीहरूसँग अवेर रातिसम्म विराटनगरको एयरपोर्ट रोडमा रहेको एक होटलमा बसेको प्रहरीले जनाएको छ ।
शवको पोष्टमार्टम चैत १९ गते कोशी अस्पतालमा गरिएको छ ।
रिपोर्टपछि हत्या वा होइन भन्ने यकिन हुने र सोही अनुसार अनुसन्धान अघि बढ्ने जिल्ला प्रहरी कार्यालयका डिएसपी दीपक श्रेष्ठको भनाइ छ ।
प्रहरीले घटनामा संलग्न भएको आशङ्कामा अनुसन्धानका लागि चैत १९ गते आठ जनालाई गिरफ्तार गरेको छ । उनीहरूको परिचय गोप्य राखिएको प्रहरीले जनाएको छ ।
मानव अधिकार रक्षकसम्बन्धी घोषणापत्र सन् १९९८ ले चिकित्सकलाई मानव अधिकार रक्षकको रूपमा परिभाषित गरेको छ ।