डेढ वर्षीया बालिकालाई बलात्कारपछि हत्या गरेको आरोपमा प्रहरीले दुई जनालाई गिरफ्तार गरी सार्वजनिक गरेको छ ।
प्रहरीले सुन्दरहरैँचा नगरपालिका–७ का २५ वर्षीय अजय चौधरी र सोही ठाउँका २८ वर्षीय मिथुन चौधरीलाई फागुन २९ गते सार्वजनिक गरेको हो ।
जिल्ला प्रहरी कार्यालयमा फागुन २९ गते आयोजित पत्रकार सम्मेलनमा आरोपितद्वयलाई फागुन २८ गते गिरफ्तार गरी सार्वजनिक गरिएको डिएसपी मञ्जिल मुकारुङले बताउनु भयो ।
घटनाका आरोपित अजय चौधरीले फागुन २७ गते बालिकालाई घरमा खेलिरहेको अवस्थामा अपहरण गरी सुन्दरहरैँचा नगरपालिका–७ स्थित गछिया खोलामा लगेर बलात्कारपछि बियरको बोटल र ढुङ्गाले हिर्काएर अर्धचेत बनाएको प्रारम्भिक अनुसन्धानका क्रममा खुलेको डिएसपी मुकारुङले बताउनु भयो ।
घटनाका आरोपित मिथुनले समेत बालिकालाई बलात्कारपछि ढुङ्गाले हिर्काएर अर्धचेत अवस्थामा खोलामा अलपत्र छाडेको डिएसपी मुकारुङको भनाइ छ ।
फागुन २७ गते साँझ घरबाट हराएकी बालिका खोला किनारमा अर्धचेत अवस्थामा फेला परेपछि उपचारका लागि सोही दिन विराटनगरस्थित विराट नर्सिङ्ग होममा भर्ना गरिएको थियो ।
बालिकाको उपचारका क्रममा फागुन २८ गते बिहान मृत्यु भएको थियो ।
पीडित पक्षको मौखिक उजुरीका आधारमा प्रहरीले छिमेकीलाई गिरफ्तार गरेको हो ।
शवको पोष्टमार्टम फागुन २७ गते वीपी कोइराला स्वास्थ्य विज्ञान प्रतिष्ठान धरान घोपामा गरिएको छ ।
पीडित पक्षले फागुन २७ गते शव बुझी सोही दिन सुन्दरहरैँचा नगरपालिका–७ स्थित घाटमा सद्गत गरेको छ ।