११२ औँ अन्तराष्ट्रिय श्रमिक महिला दिवसको अवसरमा काठमाडौँमा फागुन २४ गते इन्सेक लगायत महिला दबाब अभियानसँग आबद्ध महिला अधिकारका क्षेत्रमा क्रियाशील संस्थाहरूले संयुक्त रूपमा र्याली र कोणसभा आयोजना सम्पन्न गरिएको छ ।
“महिलाको श्रमको पहिचान, मान्यता, रोजाईको काम गर्न पाउने अधिकार, विभेद, दुर्व्यवहार मुक्त कार्यस्थल एवम् शरस्रमाथि आफ्नो अधिकारः लैङ्गिक समानताको दिगो आधार” भन्ने मूल नाराका साथ सम्पन्न भएको हो ।
कार्यक्रममा महिला अधिकारकर्मी डा. रेणु अधिकारीले नेपालमा अझै पनि महिलाले गर्ने कामको सम्मान नभएकाले महिला हिंसा नियन्त्रण हुन नसकेको बताउनुभयो ।
जबसम्म महिलाको आफ्नो श्रम, शरीर र पहिचानमाथि आफ्नै अधिकार स्थापित हुन् सक्दैन तबसम्म सामाजिक न्याय सहितको दिगो विकासको सुनिश्चितता हुन नसक्ने उहाँको भनाई थियो ।
त्यस्तै सुनिता फाउन्डेसनकी अध्यक्ष सुनिता दनुवारले समाज परिवर्तन गर्नको लागि घर भित्रको महिला अधिकार बलियो हुनुपर्नेमा जोड दिनुभयो ।
उहाँले महिलाको पूर्ण अधिकारका लागि राज्य तथा समाजले नीतिगत र व्यवहारिक रूपमा रुपान्तरणकारी भूमिका खेल्नुपर्ने बताउनुभयो ।
त्यस्तै अधिकारकर्मी बिमल लामाले विद्यमान सामाजिक संरचनाले महिलाको गतिशिलता र आफ्नो शरीरमाथिको अधिकार कुण्ठित भएको छ भने अर्कोतर्फ उनीहरूले गर्ने श्रमलाई सामाजिक र सांस्कृतिक रूपमा बहिस्करणमा पारिएको उल्लेख गर्नुभयो ।
उहाँले महिला अधिकारको सम्मानका लागि महिलाको हरेक क्षेत्रको काम उत्पादनशील श्रम हो भन्ने मान्यता स्थापित हुनुपर्नेमा जोड दिनुभयो ।
कार्यक्रमका अवसरमा नेपाल पब्लिक हेल्थ विद्यार्थी समाजले चेतनामुलक सडक नाटक प्रस्तुत गरेका थिए ।
सोही अवसरमा महिला मानव अधिकार रक्षक सन्जाल, विभिन्न संस्था तथा विद्यार्थीको सहभागितामा ८ मार्च २०२२ देखि ८ मार्च २०२३ सम्मका लागि महिला दबाब अभियान समेत घोषणा गरिएको थियो ।
