१८ वर्षीया युवतीलाई बलात्कारपछि हत्या गरेको कसुरमा जिल्ला अदालतले फुङलिङ नगरपालिका–१० फुरूम्बुका २४ वर्षीय रामकुमार कार्कीलाई फागुन १५ गते ३६ वर्ष कैद सजायको फैसला सुनाएको छ ।
न्यायाधीश प्रकाश राउतको इजलासले कसुर गरेको ठहर गर्दै हत्या गरेको कसुरमा २५ वर्ष कैद र बलात्कार गरेको कसुरमा ११ वर्ष गरी ३६ वर्षको कैद सजायको फैसला सुनाएको अदालतका इजलास सहायक निमाछिरीङ शेपाले इन्सेक प्रतिनिधिसँगको फोन सम्पर्कमा बताउनु भयो ।
अदालतको सोही आदेशले कसुरबाट पीडित पक्षले पाउने गरी ३ लाख रुपियाँ क्षतिपूर्ति भराउन आदेश भएको इजलास सहायक शेर्पाले बताउनु भयो ।
पीडितलाई आरोपितले ०७८ असोज ८ गते बलात्कारपछि हत्या गरेर फुङलिङ नगरपालिका–७ दोखुपट्टिको भीरबाट लडाएर हत्या गरेको आरोपमा पीडित पक्षले आरोपितविरूद्ध असोज १० गते जिल्ला प्रहरी कार्यालयमा उजुरी दिएको थियो ।
असोज ८ गतेदेखि बेपत्ता भएकी पीडितको खोजीका क्रममा असोज १० गते शव फेला परेपछि पीडित पक्षले दिएको उजुरीका आधारमा प्रहरीले आरोपितलाई माघ १० गते गिरफ्तार गरेको थियो ।
प्रेम सम्बन्धमा रहेको र आफूले विवाहको प्रस्ताव गर्दा प्रेमिकाले नमानेपछि हत्या गरेको आरोपितले अनुसन्धानका क्रममा बताएपछि प्रहरीले आरोपितविरूद्ध जिल्ला अदालतमा बलात्कारपछि हत्या शीर्षकमा मुद्दा दर्ता गरेको थियो ।
जिल्ला अदालतको ०७८ कात्तिक ५ गतेको आदेशमा आरोपित पुर्पक्षका लागि थुनामा गएका थिए ।
शवको पोष्टमार्टम जिल्ला अस्पतालमा असोज १० गते गरिएको थियो ।
पीडित पक्षले ०७८ असोज ११ गते शव बुझी फक्ताङलुङ गाउँपालिका–३ लिङ्खिममा शवको अन्त्येष्टि गरेको गरेको थियो ।