आदर्शकोतवाल गाँउपालिका–७ कोतवाली टोलकी नौ वर्षीया रुपमाला कुमारीलाई गत पुस २५ गते बलात्कारपछि हत्या गरेको आरोपमा प्रहरीले आदर्शकोतवाल गाँउपालिका–८ कोत्वाली टोलका सन्तोष साह कानुलाई माघ २ गते गिरफ्तार गरेको छ ।
बालिकाको हत्या गरेको आरोपमा सन्तोषकी ४० वर्षीया आमा शान्तिदेवी कानुलाई पनि प्रहरीले गिरफ्तार गरेको जनाएको छ ।
पीडित बालिका पुस २५ गते दिउँसो बाख्रा चराउन गएपछि सम्पर्कविहीन भएको भन्दै बालिकाका बाबुले पुस २६ गते जिल्ला प्रहरी कार्यालयमा हराएको उजुरी दिएका थिए ।
पुस २७ गते दिउँसो सोही टोलको जमुनी खोलामा शव फेला परेको थियो । पीडित बालिकाको घाँटी कसी टाउकोमा प्रहार गरी बलात्कारपछि हत्या गरेको प्रारम्भिक अनुसन्धनमा देखिएको जिल्ला प्रहरी कार्यालयका डिएसपी राजेश थापाले बताउनु भयो ।
प्यास लागेर पानी खान आरोपितको कुखुरा फर्ममा गएकी बालिका फर्केर नआएको मृतकसँग बाख्रा चराउन गएका प्रत्यक्षदर्शी बताएका छन् ।
आरोपित सन्तोषले बलात्कार गरी हत्या गरेको र शान्ति देवीले बलात्कार र हत्या गर्दा भएका प्रमाणहरू लुकाउन सहयोग गरेको प्रहरीको आरोप छ ।
शवको पोष्टमार्टम पुस २८ गते कलैया अस्पतालमा गरी परिवारले अन्तिम संस्कार गरेका थिए ।