चार वर्षीया बालिकालाई बलात्कारपछि ढुङ्गा प्रहार गरी हत्या प्रयास गरेको आरोपमा प्रहरीले भारतको, अररिया जिल्ला स्थायी घर भई कटहरी गाउँपालिकामा बस्दै आएका २४ वर्षीय मुकेश सरदारलाई मङ्सिर ५ गते गिरफ्तार गरेको छ ।
पीडित बालिकालाई आरोपितले मङ्सिर ४ गते बलात्कारपछि ढुङ्गा प्रहार गरी हत्या प्रयास गरेको प्रारम्भिक अनुसन्धानका क्रममा खुलेको जिल्ला प्रहरी कार्यालयका डिएसपी दीपक श्रेष्ठले इन्सेक प्रतिनिधिसँगको फोन सम्पर्कमा बताउनु भयो ।
पीडित बालिकाका बाबुआमा खेतमा काम गर्न गएको मौका छोपी आरोपितले बालिकालाई घरबाट खोलामा पुर्याएर बलात्कार गरेको अनुसन्धानका क्रममा खुलेको डिएसपी श्रेष्ठले बताउनु भयो ।
खेतबाट घर फर्किएका बाबुआमाले छोरी घर नभएपछि खोजी गरेका थिए । खोजीका क्रममा नजिकैको खोला किनारामा अर्धचेत अवस्थामा छोरी फेला परेको पीडित बालिकाका बाबुले इन्सेक प्रतिनिधिसँगको फोन सम्पर्कमा बताउनु भयो ।
घाइते बालिकाको उपचार मोरङस्थित एक अस्पतालमा भइरहेको छ ।