३१ वर्षीया महिलालाई बलात्कार गरेको कसुरमा जिल्ला अदालतले सिदिङ्मा गाउँपालिका–७ सुरुमखिमका ४२ वर्षीय जितमान राईलाई असोज १८ गते आठ वर्ष कैद सजायको फैसला सुनाएको छ ।
न्यायाधीश प्रकाश राउतको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट २ लाख ५० हजार रुपियाँ क्षतिपूर्ति भराउन र १ हजार ८ सय रुपियाँ पीडित राहत कोषमा जम्मा गराउन आदेश भएको अदालतका इजलास सहायक निमाछिरीङ शेर्पाले इन्सेक प्रतिनिधिसँगको फोन सम्पर्कमा बताउनु भयो ।
०७५ फागुन २५ गते बलात्कार गरेको आरोपमा पीडितले आरोपितविरूद्ध ०७६ पुस १० गते जिल्ला प्रहरी कार्यालयमा उजुरी दिनु भएको थियो ।
आरोपितलाई प्रहरीले पुस १० गते गिरफ्तार गरी माघ ६ गते जिल्ला अदालतमा बलात्कार शीर्षकमा मुद्दा दर्ता गरी कारबाही अघि बढाएको जिल्ला प्रहरी कार्यालयका डिएसपी वालनरसिंह राणाले बताउनु भयो ।
जिल्ला अदालतको माघ ७ गतेको आदेशले आरोपितलाई पुर्पक्षका लागि थुना पठाएको थियो ।
पीडितको स्वास्थ्य परीक्षण जिल्ला अस्पतालमा ०७६ पुस १० गते गरिएको थियो ।