सल्यान प्रतिनिधि मिना बुढाथोकीका अनुसार अस्पतालमा एन्टिजेन किट सकिएपछि कोभिड–१९ परीक्षण स्थगित गरिएको स्वास्थ सेवा कार्यालय सल्यानका व्यवस्थापक दशरथ श्रेष्ठले जानकारी दिनुभएको छ । एन्टिजेन किट प्रदेश सरकारले उपलब्ध गराउँदै आएको र अहिले प्रदेशमै किट सकिएपछि पिसिआरका लागि २ सय स्वाब सङ्कलन गरेर सुर्खेत पठाइएको श्रेष्ठले बताउनुभयो । यस्तै अस्पतालमा पर्याप्त अक्सिजन नहुँदा समस्या देखिएको छ । अस्पतालका अनुसार १७ ओटा अक्सिजन सिलिण्डरमध्ये तीन ओटा सिलिण्डिर बिग्रिएका छन् । २४ घण्टामा १० ओटा सिलिण्डर सकिने डाक्टर भिमकान्त जैसीले बताउनुभयो । केहि दिनअघि मात्रै कर्णाली प्रदेशबाट अक्सिजन प्लाण्ट मेशिन आएपनि जडान गर्ने जनशक्ति नपठाउँदा मेशिन थन्किएको जैसीको भनाई छ ।
जुम्ला प्रतिनिधि मानदत्त रावलका अनुसार कोभिड–१९ सङ्क्रमण बढेपछि कर्णाली स्वास्थ्य विज्ञान प्रतिष्ठान शिक्षण अस्पताल जुम्लाले वैशाख १७ गतेदेखि ओपिडि सेवा बन्द गरेको छ । प्रतिष्ठानका निमित्त अस्पताल निर्देशक डाक्टर राजिव शाहका अनुसार सबै स्वास्थ्यकर्मी कोभिडको उपचारमा खटिनुपर्ने भएको हुँदा अहिले आकस्मिक बाहेकका सेवा बन्द गरिएको हो । यसैबिच सङ्क्रमण बढेको भन्दै जिल्ला विपद व्यवस्थापन समितिको वैशाख २१ गतेको बैठकले वैशाख २२ गतेदेखि वैशाख मसान्तसम्म जिल्लामा निषेध आदेश जारी गरेको छ ।
रूकुम पश्चिम प्रतिनिधि मनिषा केसीका अनुसार कोभिड–१९ सङ्क्रमणका बिरामीहरूको सङ्ख्या बढेपछि जिल्ला अस्पताल सल्लेमा बेडको अभाव भएको छ । आठ बेड क्षमताको अस्पतालको आइसोलेशनमा हाल १२ जना कोभिड–१९ का बिरामीहरू रहेको र आठ जना बिरामीहरूलाई भुँइमा राखेर उपचार गरिरहेको स्वास्थ्य सेवा कार्यालय रूकुम पश्चिमका कोरोना रोग नियन्त्रण फोकल पर्सन इश्वर रावलले बताउनु भयो ।
यसैबिच मुसीकोट नगरपालिकाले ५० बेडको आइसोलेशन सञ्चालन गर्ने निर्णय गरेको छ । वडा नम्बर १ सल्लेस्थित राप्ती समाज अस्पताललाई भाडामा लिएर तत्काललाई अक्सिजन सहितका पाँच बेड र अन्य नर्मल बेड गरी ५० बेडको आइसोलेशन सञ्चालन गर्न लागिएको नगरपालिकाका प्रमुख प्रशासकीय अधिकृत नरहरी तिवारीले जानकारी दिनुभयो । आइसोलेशनमा बेड र अक्सिजन जडानदेखि अन्य सबै व्यवस्थापनको काम सम्पन्न भइसकेकोले वैशाख २१ गतेबाट सञ्चालनमा ल्याइएको उहाँको भनाई छ ।