७२ वर्षीया ज्येष्ठ नागरिकलाई बलात्कार गरेको कसुरमा जिल्ला अदालतले कटारी नगरपालिका–३ हडैयाका ३१ वर्षीय वंशराज सदालाई चैत १० गते जन्मकैद सजायको फैसला सुनाएको छ ।
न्यायाधीश उत्तम सिलुवालको इजलासले कसुर गरेको ठहर गर्दै कैद सजायसँगै पीडितले पाउने गरी कसुरदारबाट ३५ हजार रुपियाँ क्षतिपूर्ति भराउन आदेश भएको छ ।
फैसलामा कसुरदारको जायजेथा नभएकाले सरकारले स्थापना गरेको पीडित राहत कोषबाट पीडितलाई ३५ हजार रुपियाँ उपलब्ध गराउन आदेश भएको अदालतका श्रेस्तेदार धनबहादुर कार्कीले इन्सेक प्रतिनिधिसँगको भेटमा बताउनु भयो ।
सोही आदेशले घटनामा मतियारको रूपमा प्रयोग भएका सोही ठाउँका २३ वर्षीय मनोज सदालाई एक वर्ष दुई महिना कैद र पीडितले पाउने गरी १५ हजार रुपियाँ क्षतिपूर्ति भराउन आदेश भएको श्रेस्तेदार कार्कीले बताउनु भयो ।
पीडित महिलालाई कसुरदारले ०७६ फागुन ८ गते बलात्कार गरेको आरोपमा पीडित पक्षले आरोपितविरूद्ध सोही दिन इलाका प्रहरी कार्यालय कटारीमा उजुरी दिएको थियो ।
पीडित पक्षको उजुरीका आधारमा आरोपितलाई प्रहरीले सोही दिन घरबाटै गिरफ्तार गरी कानुनी कारबाही अघि बढाएको थियो ।
जिल्ला अदालतको ०७६ चैत २ गतेको आदेशमा आरोपित पुर्पक्षका लागि थुनामा थिए ।
पीडितको स्वास्थ्य परीक्षण ०७६ चैत ८ गते कटारी अस्पतालमा गरिएको थियो ।