अनौपचारिक क्षेत्र सेवा केन्द्र (इन्सेक) कर्णाली प्रदेश कार्यालय सुर्खेतले घरेलुु हिंसाबाट पीडित भेरीगंगा नगरपालिका–११ की ३३ वर्षीया सीताकुमारी भण्डारीलाई १० हजार रूपियाँ आर्थिक सहयोग गरेको छ ।
मानव अधिकार सहायता कक्षको निर्णय अनुसार पीडितलाई न्यायिक प्रक्रियामा जानका लागि चैत १० गते आर्थिक सहयोग गरिएको इन्सेक कर्णाली प्रदेश संयोजक नारायण सुवेदीले बताउनुभयो ।
अन्तरजातीय विवाह गरेकी सीतालाई पतिले अर्को विवाह गरेर बेवास्ता गरी उल्टै सम्बन्ध विच्छेदको मुद्दा दर्ता गराएका छन् । आफ्नो र छोरा छोरीको लागि अंश पाउँ भनेर आफू कानुनी प्रक्रियामा गएकोले इन्सेकको सहयोगले अदालत आउन जान र अन्य खर्चको लागि ठूलो सहयोग पुगेको सीताको भनाई छ ।
यसैबीच चैत ८ गते बसेको मानव अधिकार कक्षको बैठकले पीडित भण्डारीलाई निशुल्क कानुनी सेवा प्रदान गर्न मानव अधिकार सहायता कक्षका सदस्य अधिवक्ता उत्तमप्रसाद आचार्य मार्फत उच्च अदालत बार एसोसिएशनलाई अनुरोध गरेको छ ।
उच्च अदालत बार एसोसिएशन सुर्खेतका अध्यक्ष समेत रहेका आचार्यले बैठकमा पीडित सीतालाई निशुल्क सेवा दिने प्रतिवद्धता व्यक्त गर्नुभएको थियो ।