खैरहनी नगरपालिका–९ सिमलटाँडीका ४५ वर्षीय कृष्णप्रसाद अधिकारीलाई पत्नी ३४ वर्षीया अन्जु अधिकारीको हत्या गरेको कसुरमा जन्म कैद सजाय फैसला भएको छ ।
जिल्ला अदालतका न्यायधीश प्रकाशकुमार अधिकारीको माघ १८ गतेको इजलासले उक्त फैसला सुनाएको अदालतका श्रेष्तेदार ईश्वर आचार्यले बताउनुभयो ।
यसै घटनामा दोषी भनिएकी कृष्णप्रसादकी कान्छी पत्नी ३५ वर्षीया शर्मीला अधिकारी ढुङ्गानाले भने सफाई पाएकी छन् ।
अधिकारी विरुद्ध ०७७ वैशाख २७ गते राती पत्नी अञ्जु अधिकारीलाई घाँटीमा खुकुरी प्रहार गरी हत्या गरेको आरोपमा कर्तव्य ज्यान मुद्दा चलाएको जिल्ला प्रहरी कार्यालय चितवनले जनाएको छ ।
घरायसी विवादकाकारण अधिकारीले खुकुरी प्रहार गर्दा अञ्जुको घटनास्थलमै मृत्यु भएको थियो । शवको वैशाख २८ गते भरतपुर अस्पतालमा पोष्टमार्टम भएको थियो ।
कृष्ण र उनकी कान्छी पत्नी शर्मीलालाई इलाका प्रहरी कार्यालय खैरहनीले वैशाख २७ गते राती नै गिरफ्तार गरेको थियो ।
आरोपितविरुद्ध मृतकका बुवा बारा जिल्ला सीमरा उपमहानगर–१ का बच्चुराम तिमल्सिनाले वैशाख २८ गते इलाका प्रहरी कार्यालय खैरहनीमा उजुरी दिनु भएको थियो ।
जिल्ला अदालतको न्यायाधीश हेमन्त रावलको जेठ २२ गतेको आदेशले कृष्णप्रसादलाई पुर्पक्षका लागि थुना पठाएइएको थियो भने शर्मीलालाई साधारण तारेखमा रिहा गरेको थियो ।