नीलकण्ठ नगरपालिका– ११ ज्यामरुङकी २० वर्षीया पुजा परियारको शरीरमा तातो तेल खन्याएर मार्न खोजेको आरोपमा पति २४ वर्षीय अस्विन परियारलाई प्रहरीले ०७७ कात्तिक २० गते गिरफ्तार गरेको छ ।
घरमा बसिरहेकी पत्नीलाई कात्तिक १८ गते तेल तताएर शरीरमा खन्याएपछि पुजा सख्त घाइते हुनुभएको छ । तातो तेलले टाउको, ढाड, घाँटी, गोडा र हातमा पोलेको छ ।
घाइतेको काठमाडौँस्थित कीर्तिपुर मोडेल अस्पतालमा उपचार भइरहेको र आरोपितलाई गिरफ्तार गरी अनुसन्धान सुरु गरिएको जिल्ला प्रहरी कार्यालय धादिङका सूचना अधिकारी डिएसपी लोकनाथ तिम्सिनाले जानकारी दिनुभयो ।
आरोपित विरुद्ध प्रहरीले ज्यानमार्ने उद्योग अन्तरगत मुद्दा दर्ता गरेको छ । घटना प्रकृति अनुसार मुद्दामा अनुसन्धान हुने र कसुर अनुसारको अदालतले सजायाँ गर्ने डिएसपी तिम्सिनाले बताउनु भयो ।