१६ वर्षीया बालिकालाई अपहरण गरी शरीर बन्धक बनाएर यौन शोषण गरेको आरोपमा मिथिला विहारी नपा–६ का २० वर्षीय रघुविर यादवविरुद्ध जिल्ला प्रहरी कार्यालयमा पीडितकी आमाले कात्तिक १३ गते उजुरी दिएकी छन् ।
कात्तिक १ गते घरबाटै ललाइफकाई बीरगंजमा लगेर यौनशौषण समेत गरेको पीडितले इन्सेक प्रतिनिधिलाई बताइन् ।
यादवले पीडित बालिकालाई विवाह गर्ने भनेर ललाइफकाई गरेर कात्तिक १ गते बीरगंज लगेर डेरामा राखेर यौन शोषण गरी कात्तिक १२ गते राति पुनः घरमा छोडेर भागेको आरोप छ ।
जिल्ला प्रहरी कार्यालयकी असई दिपिका ओझाले पीडितलाई ललाइफकाई प्रेमजालमा पारेर यौन शोषण गरेकाले आरोपितलाई गिरफ्तार गरी कारवाही गरिने बताउनु भयो ।
पीडित बालिकाको स्वास्थ्य परीक्षण कात्तिक १३ गते प्रादेशिक अस्पताल जनकपुरमा गरिएको छ ।