१५ वर्षीया बालिकालाई बलात्कार गरेको आरोपमा प्रहरीले सिन्धुलीको इन्द्रसरोवर गाउँपालिका–३ स्थायी घर भई हालकागेश्वरी मनहरा नगरपालिका–७ स्थित काँडाघारी बस्ने ३१ वर्षीय डेविट भनिने सुशील खड्कालाई गिरफ्तार गरेको छ ।
आरोपितलाई प्रहरीले काठमाडाँको कागेश्वरी मनहरा नगरपालिका–७ स्थित वीरेन्द्रचोकबाट गिरफ्तार गरेको महानगरीय प्रहरी परिसर काठमाडौँका प्रवक्ता एसपी सोमेन्द्र राठौरले इन्सेक प्रतिनिधिलाई जानकारी दिनुभयो ।
पीडित बालिकालाई आरोपितले साउन २८ गते वीरेन्द्रचोकस्थित भेटघाट रेष्टुरेन्टमा बालिकालाई बोलाई म्युजिक भिडियोमा खेलाउने भन्दै प्रलोभन देखाई वियर खुवाएर लठ्याएको प्रहरी अनुसन्धानबाट खुलेको छ ।
त्यसपछि राती सोही रेष्टुरेन्टको क्याविनमा राखी जबरजस्ती करणी गरेको खुलेको महानगरीय प्रहरी परिसर काठमाडौँका प्रवक्ता एसपी राठौरले बताउनु भयो ।
पीडितले दिएको उजुरीका आधारमा खड्कालाई साउन २९ गते बिहान गिरफ्तार गरेर थप अनुसन्धान कार्य जारी रहेको जिल्ला प्रहरी कार्यालयले जनाएको छ । पीडित बालिकाको स्वास्थ्य परीक्षण साउन २९ गते थापाथली स्थीत प्रसुति गृहमा गरिएको एसपी राठौरले बताउनु भयो ।