द्रुत परीक्षण (र्यापिड डायगनोष्टिक टेष्ट) मा कोराना भाइरस पोजेटिभ देखिएकी महिलालाई क्वारेण्टाइन सम्म ल्याउन नमान्ने नेपाल रेडक्रस बिहुँ शाखाका एम्बुलेन्स चालकलाई बर्खास्त गरिएको छ ।
बागलुङको काठेखोला गाउँपालिका–७ इनारपानीकी ६५ वर्षीया महिलाको र्यापिड टेष्टमा कोराना भाइरस पोजेटिभ देखिएपछि काठेखोला गाउँपालिकाले कोरोना सङ्क्रमण र सङ्क्रमणको आशङ्का गरिएका बिरामी बोक्न तयार पारेको नेपाल रेडक्रस बिहुँ शाखाका चालकले एम्बुलेन्स बिग्रिएको भन्दै बिरामी बोक्न नसक्ने बताएका थिए ।
चालकलाई कोरोना सङ्क्रमणबाट बच्न, बिरामी ल्याउन लैजान, पीपीइको प्रयोग र डिस्पोज गर्ने तालिम दिएर अतिरिक्त व्यवस्था गरिएको भएपनि बिरामीलाई क्वारेण्टाइनमा ल्याउनुपर्याे भन्दा चालकले फोनबाट एम्बुलेन्स बिग्रिएको बताएका थिए ।
चालकले बिरामी बोक्न अस्वीकार गरेपछि उहाँलाई तत्कालै बर्खास्त गरिएको काठेखोला गाउँपालिका अध्यक्ष अमर थापाले जानकारी दिनुभएको छ ।
चैत ३० गते दिउँसो द्रुत परीक्षण (र्यापिड डायगनोष्टिक टेष्ट ) गरिएको भएपनि चालकले एम्बुलेन्स बिग्रिएको छ भनेपछि जिल्ला प्रहरी कार्यालय बागलुङको टोलीले राति ११ बजे महिलाको घरमै पुगेर उद्धार गरी भिमसेन माध्यमिक विद्यालयको क्वारेण्टाइनमा राखेको छ ।
यसभन्दा अगाडी पनि बागलुङ नगरपालिकाकी कोरोना सङ्क्रमित ६५ वर्षीया महिलालाई अस्पताल ल्याउन नेपाल रेडक्रस सोसाईटी बागलुङका एम्बुलेन्स चालकले मानेका थिएनन् ।
उनी अस्पतालमा एम्बुलेन्स र चाबी छोडेर फरार भएका थिए । सङ्क्रमित महिलालाई स्वास्थ्य कार्यालय बागलुङका प्रमुख सुरज गुरौका सवारी चालक दिपक पराजुली अस्पताल ल्याउनुभएको थियो।