बलान बिहुल गाउँपालिका–३ की १४ वर्षीया बालिकाको हुन लागेको बालविवाह फागुन ३० गते त्यहाँका स्थानीयवासीहरुको पहलमा रोकिएको छ ।
कानून विपरित बालिकाको विवाह गर्न नपाइने भन्दै स्थानीयवासीहरुले रोक लगाए पछि फागुन २९ गतेको विवाह लग्नमा हुन नपाएको विवाह लुकिछिपी फागुन ३० गते पुनः गर्न खोजेकोमा पुनः स्थानीयवासीहरुकै प्रयासमा रोकिएको छ ।
स्थानीयवासीहरुले बालविवाह हुन लागेको सूचना सिडिओ सुनिल खनाल र इन्सेक सप्तरी जिल्ला प्रतिनिधीलाई दिएपछि सिडिओको निर्देशन र इन्सेक प्रतिनिधीको पहलमा प्रहरी सक्रिय भएपछि बालविवाह रोकिएको वडा नम्बर ३ का वडा अध्यक्ष कपलेश्वर मण्डलले बताउनु भयो ।
बालविवाहको जानकारी सत्य भएपछि प्रहरी चौकी बेल्हीको टोलीले विवाहस्थल पुगी विवाहको मण्डप भत्काएको र बेहुलीको भेषमा सजिएकी बालिका र उनकी आमालाई नियन्त्रणमा लिएको प्रहरी चौकीका असई दिनेश राजवंशीले बताउनु भयो ।
भारत बिहार सुपौलबाट आएको बेहुलासहितका १२ जनाको जन्ती सप्तरीको हनुमाननगर कंकालिनी नपा–१ भारदहस्थित कंकालिनी मन्दिरमा पूजा गरी को.१ ज १९०८ नम्बरको टेम्पो रिजर्भ गरेर विवाह गर्न फागुन ३० गते अपरान्ह बलान विहुल गाउँपालिका–३ पुगेका थिए । विवाह रोक्न प्रहरी पुगेपछि उनीहरु विवाह नगर्ने भन्दै निक्लिएको स्थानीयवासीहरूले बताएका छन्।