बिजौरी उद्योग बाणिज्य सङ्घका अध्यक्ष पदका उम्मेदवार तुलसीपुर उपमनपा–१९ का ३७ वर्षीय प्रेमनाथ योगीको बा १९ च १७६४ नम्बरको स्कारपियो गाडीमा फागुन ७ गते अज्ञात पक्षले आगजनी गरेको छ ।
फागुन ८ गते हुने निर्वाचनकालागि प्रचार प्रसारकामा घरदैलोमा गएका बेला गाडीको टायरमा पेट्रोल छर्केर आजगनी गरिएको पीडितले बताउनु भयो । टायरमा आगो लागेको बेला घरधनीले थाहा पाए पछि थप क्षति हुनबाट रोकिएको थियो । आगजनीबाट गाडीको एउटा टायर र पछाडीको भागमा क्षति पुगेको छ ।
योगीले आगजनी गर्नेको पहिचान गरी कारवाहीको माग गर्दै फागुन ७ गते हेमन्तपुरा प्रहरी चौकीमा उजुरी दिनु भएको छ ।
आगजनीबाट १ लाख रूपिँया बराबरको क्षति भएको इलाका प्रहरी कार्यालय तुलसीपुरका इन्स्पेक्टर चक्रडम्बर पालले बताउनु भयो । उहाँले घटनाको अनुसन्धान भइरहेको बताउनु भयो ।