कथित बोक्सीको आरोपमा अमानविय व्यवहार गरेको भन्दै राजविराज नपा–१४ पुरानो टोल परसाहीकी ४६ वर्षीया अमलाकुमारी रामले दिएको उजुरी दर्ता नगर्नाका कारण माग गर्दै उच्च अदालत जनकपुर राजविराज इजलासले पुस ७ गते कारण देखाउ आदेश जारी गरेको छ ।
न्यायाधीश सीताराम मण्डलको इजलाशले जिल्ला प्रहरी कार्यालय सप्तरी, कार्यालय प्रमुख एसपी र जिल्ला सरकारी वकिल कार्यालयका नाममा १५ दिनभित्र कारण देखाउन आदेश जारी गरेको अदालतले जनाएको छ ।
आदेशमा के–कति कारणले परमादेश जारी हुनु नपर्ने हो कारणसहित १५ दिनभित्र उच्च सरकारी वकिल कार्यालयमार्फत उपस्थित हुन विपक्षीहरूको नाममा म्याद जारी गरिएको छ ।
मुलुकी फौजदारी कार्यविधी संहिता २०७४ को दफा ४ बमोजिम प्रहरी र सरकारी वकिल कार्यालयले अनुसन्धान तहकिकात गरी अभियोग पत्र पेश गर्नुपर्नेमा कानुनी कर्तव्य पुरा गर्न नचाहेकाले अन्यायमा परी परमादेशको लागि पुस ६ गते पीडितले रिट निवेदन दिएको बताउनु भयो ।
पीडितलाई असोज ७ गते ५५ वर्षीय सत्यनारायण राम, उनकी पत्नी ५० वर्षीया रामशोभादेवी राम, २० वर्षीया छोरी सीताकुमारी राम, छोरा बुहारी ३० वर्षीया बेचनीदेवी चमैन र भतिजा ३० वर्षीय जोगेन्द्र रामले कथित बोक्सीको घर भत्काऔँ भनी अपमानजनक व्यवहार गर्दै जगल्टा समाती लाठीले कुटपिट गरेको भन्दै पीडितले असोज १४ गते जिल्ला प्रहरी कार्यालयमा उजुरी दिनु भएको थियो ।
असोज १३ गते पीडितको उपचार र घाउ जाँच परीक्षण गजेन्द्रनारायण सिंह अस्पतालमा गरिएको थियो । आरोपितहरू उपस्थित गराउन अस्थायी प्रहरी पोष्ट तेतरी गाछीका नाममा मङ्सिर १ गते पत्र पठाए पनि आलटाल गरी जिल्ला प्रहरी कार्यालयले उजुरी दर्ता नगरेपछि पीडितले मङ्सिर ३० गते जिल्ला हुलाक कार्यालयमार्फत रजिष्ट्रि गरी उजुरी पठाउनु भएको थियो ।
जिल्ला सरकारी वकिल कार्यालयमा उजुरी दिँदा निवेदन दर्ता गर्न इन्कार गरेपछि मङ्सिर ३० गते जिल्ला सरकारी वकिल कार्यालयका नाममा समेत निवेदन रजिष्ट्रि गरी पठाएको पीडितका छोरा दिलिप रामले बताउनु भयो ।
छिमेकी इतल रामले आरोपितहरुले कथित बोक्सी भन्दै पीडितलाई पटकपटक कुटपिट गर्दै आएको र गाउँमा छलफल गरी मिलापत्र गर्ने गरिएको बताउनु भयो ।