वरिष्ठ पत्रकार, अग्रज बाल साहित्यकार, सूचना विज्ञ एवम् इन्सेकका मानार्थ सदस्य विनय कसजूको मङ्सिर १० गते ७२ वर्षको उमेरमा निधन भएको खबरले दुःखी तुल्याएको इन्सेकले जनाएको छ ।
‘शोकको यस घडीमा दिवङ्गत आत्माको चिरशान्तिको कामना गर्दै शोक सन्तप्त परिवारजनमा हार्दिक समवेदना व्यक्त गर्दछौँ ।’–इन्सेकका कार्यकारी निर्देशक विजयराज गौतमद्वारा जारी विज्ञप्तिमा उल्लेख छ ।
स्व. कसजू इन्सेकका मानार्थ सदस्य र इन्सेक कार्यसमितिका सल्लाहकारका साथै संस्थापक महासचिव प्रकाश काफ्लेको स्मृतिमा २०५१ सालमा स्थापित प्रकाश मानव अधिकार पुरस्कारबाट सम्मानित हुनु हुने पहिलो व्यक्तित्व हुनहुन्थ्यो ।
इन्सेकले कसजूलाई ०५२ साउन १६ गते प्रकाश मानव अधिकार पुरस्कारबाट सम्मान गरेको थियो । उहाँ राष्ट्रिय सूचना आयोगको पहिलो प्रमुख आयुक्त हुनुहुन्थ्यो ।
‘सामाजिक रेडियोका अभियन्ता कसजू सूचना आयोगका पहिलो प्रमुख आयुक्तका साथै नेपाली भाषा साहित्य, बालसाहित्य, पत्रकारिता र मानव अधिकार क्षेत्रमा लामो सक्रिय हुनुहुन्थ्यो । नेपाली भाषा, साहित्य, ग्रामीण पत्रकारिताको विकास, मानव अधिकार तथा सूचनाको हकलगायतका विधामा उहाँले योगदान पुर्याउनु भएको योगदानको स्मरण पुस्तौँसम्म हुनेछ ।’–विज्ञप्तिमा भनिएको छ । स्वर्गीय कसजूका पत्नी र तीन छोरा हुनुहुन्छ ।