इन्सेकको नवनिर्वाचित कार्यसमिति सदस्यहरूलाई इन्सेक केन्द्रीय कार्यालयमा आज कात्तिक २५ गते आयोजित एक कार्यक्रममा इन्सेकका कर्मचारीले स्वागत तथा बधाई ज्ञापन गरेका छन् ।
कार्यक्रममा नवनिर्वाचित अध्यक्ष डा. इन्दिरा श्रेष्ठले मानव अधिकार र सामाजिक न्यायका निम्ति इन्सेकले बनाएको छविलाई अझै उचो बनाउने प्रतिबद्धता व्यक्त गरिन् ।
कार्यक्रममा इन्सेकका कार्यकारी निर्देशक विजयराज गौतमले नवनिर्वाचित कार्यसमितिले इन्सेकले मानव अधिकारको क्षेत्रमा बनाएको छविलाई अझै उचो बनाउने अपेक्षा राखेको बताउँदै कार्यसमितिले निर्देश गरेका नीतिलाई कार्यान्वयन गर्ने प्रतिबद्धता व्यक्त गरे ।
निर्देशक श्रीराम बजगाइँले मानव अधिकार र सामाजिक न्यायका निम्ति कार्यसमितिले निर्दिष्ट गरेका लक्ष्य प्राप्तिका लागि क्षमता अभिवृद्धि गर्न र क्षमताले भ्याएसम्मका काम गर्न कुनै कसर बाँकी नराख्ने बताए ।
गत कात्तिक २२ गते सम्पन्न इन्सेकको २३ औँ साधारण सभाले डा. श्रेष्ठको अध्यक्षतामा दीपकराज काफ्ले, नजिर मियाँ, गीता बराल, रुद्रबहादुर चर्माकार, रघुनाथ अधिकारी र शोभाकर बुढाथोकी रहेको कार्यसमिति चयन गरेको थियो ।
