१० वर्षीया बालिकालाई यौन दुर्व्यवहार गरेको कसुरमा जिल्ला अदालत स्याङ्जाले चापाकोट नगरपालिका–८ का ५५ वर्षीय रामचन्द्र पौडेललाई भदौ २९ गते एक वर्ष कैदको सजायको फैसला गरेको छ ।
न्यायाधीश रामनाथ पौड्यालको इजलासले आरोपितलाई कैद सजायसँगै पीडित बालिकालाई १ लाख रुपियाँ क्षतिपूर्ति स्वरुप भराउने र १५ हजार रुपियाँ जरिबाना भराउन आदेश भएको श्रेस्तेदार नन्दप्रसाद अचार्यले बताए ।
पीडित बालिकालाई आरोपितले ०७५ असोज ६ गते यौन दुर्व्यवहार गरेको भनी असोज ७ गते वडा प्रहरी कार्यालय वालिङमा बालिकाका आफन्तले उजुरी दिएका थिए ।
उजुरी लगतै प्रहरीले असोज ७ गते नै आरोपितलाई गिरफ्तार गरी कानुनी कारबाही अघि बढाएको थियो भने पीडित बालिकाको स्वास्थ्य परीक्षण असोज ७ गते गह्रौ घ्याङ्गलिङ प्राथमिक स्वास्थ्य केन्द्रमा गरिएको थियो ।