१५ वर्षीया बालिकालाई बालविवाह गरेको आरोपमा थुनामा रहेका कालिकानगरपालिका–३ का ४३ वर्षीय मानकुमार कुमाललाई जिल्ला अदालतले एक वर्ष कैदसहित १० हजार रुपियाँ जरिवानाको फैसला सुनाएको छ ।
न्यायाधीश विनोदकुमार गौतमको इजलासले वैशाख १६ गते उक्त फैसला गरेको अदालतका श्रेष्तेदार रूद्रमणी गिरीले बताए ।
बलात्कारको समेत आरोप लागेका कुमालले यस आरोपबाट भने सफाई पाएको र विवाह बदर भई बालविवाहमा मुद्दा चलेको गिरीले बताए ।
पीडित बालिकालाई आरोपितले ०७५ भदौ २० गते बालविवहा गरी बलात्कार गरेको भन्दै पीडित पक्षले भदौ २७ गते इलाका प्रहरी कार्यालय रत्ननगरमा उजुरी दिएको थियो ।
उक्त उजुरीको आधारमा प्रहरीले सोही दिन आरोपितलाई गिरफ्तार गरी अनुसन्धानका लागि थुनामा राखेको थियो । पीडित बालिकाको स्वास्थ्य परीक्षण भदौ २८ गते भरतपुर अस्पतालमा गरिएको थियो ।