नेपाल प्रहरीको हिरासतमा राजनीतिक बन्दीको रूपमा रहेका नेत्रविक्रम चन्द (विप्लव) नेतृत्वको नेपाल कम्युनिष्ट पार्टीका कार्यकर्ताहरूबारे जानकारी लिनका लागि अनौपचारिक क्षेत्र सेवा केन्द्र (इन्सेक) र नेपाल मानव अधिकार सङ्गठनका प्रतिनिधि सम्मिलित एक टोलीले वैशाख १५ गते हिरासतको अनुगमन गरेको छ ।
नेपाल मानव अधिकार सङ्गठनका केन्द्रीय सदस्य कृष्ण दाहाल, जिल्ला अध्यक्ष सीतारामप्रसाद बर्मा र इन्सेक जिल्ला प्रतिनिधि सीताराम अधिकारीले जिल्ला प्रहरी कार्यालयको हिरासत अनुगमन गरेका हुन् ।
हिरासत अनुगमनका क्रममा नेकपाका जिल्ला जनसरकार उपप्रमुख सिद्धलेक गाउँपालिका–६ का ४२ वर्षीय धनबहादुर घले र सो पार्टीका सदस्य चितवन जिल्ला भरतपुर महानगरपालिका–१८ निवासी ३० वर्षीय इश्वर पाण्डे हिरासतमा रहेका छन् ।
उनीहरूलाई सङ्गठित अपराध अन्तर्गत जिल्ला अदालतको वैशाख १० गतेको आदेश अनुसार न्यायिक हिरासतमा राखिएको जिल्ला प्रहरी कार्यलयका एसपी राजकुमार वैद्धवारले जानकारी दिए ।
घलेलाई ०७५ चैत १२ गते सिद्धलेक गाउँपालिका–६ बाट र पाण्डेलाई ०७६ वैशाख ९ गते नीलकण्ठ नगरपालिका–८ बाट प्रहरीले गिरफ्तार गरेको थियो ।
प्रहरी हिरासतमा आफूहरूलाई अमानवीय व्यवहार नगरेको घले र पाण्डेले टोलीलाई बताएको अधिकारकर्मी सिताराम बर्माले बताए ।