जिल्ला जनस्वास्थ्य कार्यालय भरतपुरले सञ्चालन गर्दै आएको मातृ शिशु क्लिनिकमा खोप सेवा दिँदै आएका कर्मचारी नहुँदा साना बालबालिकाले खोप सेवाबाट बञ्चित हुनु परेको छ ।
हरेक आइतबार, मंगलबार र शुक्रबार खोप सेवा दिइँदै आएकोमा सरकारले दरवन्दी नै काटेको र दरबन्दी भएकाहरू पनि निवृत्तभरणमा निस्केकाले समस्या भएको जिल्ला जनस्वास्थ्य कार्यालय चितवनले जनाएको छ ।
उक्त मातृ शिशु क्लिनिकमा कार्यरत दुई जना अनमी निवृत्त भइ गएको र उनीहरूको ठाउँमा नयाँ दरबन्दी नभएकाले पनि यस्तो समस्या भएको जनस्वास्थ्य कार्यालय भरतपुरका निमित्त प्रमुख अनुप ढकालले बताए ।
कर्मचारी नभएकै कारण खोप सेवा सञ्चालन गर्न नसकिने भनेर चैत १२ गते सार्वजनिक सूचना नै जारी गरेपछि नियमित खोप लगाउँदै आएका १ सय नवजात शिशु तथा बालबालिका नियमित खोप सेवाबाट वञ्चित हुन परेको ढकालले बताए ।
यसरी सेवा दिँदै आएको सरकारी स्वास्थ्य संस्था नै बन्द भएपछि सेवा लिन अउने सेवाग्राहीहरूलाई सम्झाइ बुझाइ अन्त पठाउने गरेको उनले बताए ।
केही मिनेटको दुरीमा रहेका अन्य स्वास्थ्य संस्थाबाट खोप लिन सकिने भए पनि ती निजी संस्था भएकाले ढुक्क हुन नसकिने सेवाग्राही भरतपुर–१० की २६ वर्षीय नम्रता श्रेष्ठले बताइन् ।