नेपाली कांग्रेसका कार्यकर्ता डाकनेश्वरी नपा–१ का ३२ वर्षीय जियाउल हकको अपहरण गर्न खोजेको आरोपमा प्रहरीले खडग नपा–११ बनौली घर भई हाल डाकनेश्वरी नपा–१ बस्ने ५१ वर्षीय मलाबकस मियाँ र डाकनेश्वरी नपा–१ का ५० वर्षीय रासलाल साहविरुद्ध चैत ५ गते अपहरण तथा शरिर बन्धकको उजुरी दर्ता गरेको छ ।
घटना लगत्तै शंकास्पद चार जनालाई गिरफ्तार गरी सोधपुछ गरेको सप्तरी प्रहरीले अनुसन्धानपश्चात मियाँ र साह विरुद्ध उजुरी दर्ता गरी कारवाही थालेको हो ।
हतियारसहितका अपहरणकारीहरुले मुखमा नकाब लगाएकाले पहिचान गर्न नसकिएको बताएका हकले दुई महिनाअघि उपभोक्ता समितिको विवादका कारण अपहरणको प्रयास भएको दावी गरेका छन् ।
जियाउलले ५ लाख रुपियाँ बजेट रहेको वडा नम्बर १ स्थित मधुबनी बस्ती विद्युत उपभोक्ता समितिको अध्यक्ष भएर काम गरेका थिए ।
बोदे बर्साइन नपा–५ स्थित जिया फेशन सेन्टरका सन्चालक समेत रहेका हक पसल बन्द गरी स.८ प ७४७० नम्बरको मोटरसाइकल चढी घर फर्कने क्रममा बाटोबाटै गत फागुन २५ गते राति उनी अपहरणमा परेका थिए ।
पीडितले फागुन २६ गते जिल्ला प्रहरी कार्यालयमा गिरफ्तार भएका आरोपितसहित आठ जनाविरुद्ध उजुरी दिएका थिए ।
हतियारसहित नकाब लगाएका ८÷१० जनाले कुटपिट गर्दै कमिज र गम्छाले हात बाँधी मोटरसाइकलको बीचमा राखी डाकनेश्वरीको हटेल हुँदै भारतको लौकहीतर्फ लैजान लागेको बेला सिमा सुरक्षा बलका भारतीय प्रहरीले रोकी सोधपुछ गर्न थालेपछि अपहरणकारीहरु फरार भएको र आफ्नो ज्यान जोगिएको हकले बताए ।
सो कुराको पुष्टि सिमा सुरक्षा बलका भारतीय प्रहरीले समेत गरेको जिल्ला प्रहरी कार्यालयका डिएसपी भावेश रिमालले बताए ।
अपहरणकारीहरुको कुटपिटबाट घाइते भएका हकको पिठ्युभरी निलडाम लागेको छ । राजविराजस्थित गजेन्द्रनारायण सिंह अस्पतालमा उपचार गराएका हकको हाल न्युरो अस्पताल विराटनगरको उपचार भइरहेको छ ।