१६ वर्षीया बालिकालाई बलात्कार गरेको कसुरमा सखुवानन्कारकट्टी गाउँपालिका–१ का १८ वर्षीय दिपेन्द यादवलाई जिल्ला अदालतले फागुन १३ गते १० वर्ष कैद र ५० हजार क्षतिपुर्तिको फैसला गरेको छ ।
न्यायाधीश सुदर्शनराज पाण्डेको इजलासले सो फैसला गरेको जिल्ला अदालतका रजिष्ट्रार नरेन्द्रकुमार श्रेष्ठले बताए ।
सोही ठाउँका अर्का आरोपित २२ वर्षीय जिवेन्द्र यादव फरार रहेकोले उनको सजाय मुल्तवीमा राख्ने आदेश भएको रजिष्ट्रार श्रेष्ठले बताए ।
आरोपितहरूले ०७४ असोज १४ गते सामूहिक बलात्कार गरेको आरोपमा पीडित परिवारले इलाका प्रहरी कार्यालय लहानमा असोज १७ गते उजुरी दिएका थिए ।
पीडित बालिकाको स्वास्थ्य परीक्षण लहान स्थित रामकुमार उमाप्रसाद अस्पतालमा असोज १७ गते गरिएको थियो ।
इलाका प्रहरी कार्यालय लहानले आरोपित दिपेन्द्र यादवलाई असोज १७ गते गिरफ्तार गरेको थियो भने अर्का आरोपित फरार रहेका थिए । जिल्ला अदालतको आदेशमा आरोपित कात्तिक १४ गतेदेखि पुर्पक्षका लागि थुनामा रहेका थिए ।