३५ वर्षीया महिलालाई बलात्कार गरेको कसुरमा जिल्ला अदालतले भारत बिहारको मधुबनी राज्य धर्मपुर–५ का ४५ वर्षीय भरतलाल भनिने बरतलाल पोद्दारलाई फागुन ९ गते पाँच वर्ष कैद सजायको फैसला गरेको छ ।
न्यायाधीश श्रीप्रसाद सञ्जेलको फागुन ९ गतेको इजलासले पोद्दारलाई पाँच वर्ष कैद सजायको फैसला गरेको अदालतले जनाएको छ ।
घटनास्थलबाट गाउँलेहरूले नियन्त्रणमा लिई प्रहरीलाई जिम्मा लगाएको र पीडित तथा तत्काल घटनास्थलमा उपस्थित व्यक्तिहरूले गरेको बयानलगायतका आधारमा आरोपितले बलात्कार गरेको पुष्टि भएकोले कैद सजायको फैसला गरिएको न्यायाधीश सञ्जेलले बताए ।
पीडितले गुहार मागेपछि जम्मा भएका गाउँलेहरूले आरोपितलाई ०७४ कात्तिक १५ गते राति नियन्त्रणमा लिई कुटपिट गर्दै प्रहरीको जिम्मा लगाएका थिए ।
पीडितले इलाका प्रहरी कार्यालय कल्याणपुरमा ०७४ कात्तिक १६ गते दिएको उजुरी सोही दिन दर्ता भएको थियो ।
प्रहरीका अनुसार गाउँलेहरूको कुटाइबाट घाइते भएका आरोपितको सिरहाको लहानस्थित रामकुमार उमाप्रसाद स्मारक अस्पतालमा उपचार समेत भएको थियो ।
दशगजा सिमा नजिक घर भएकाले पोद्दारले डर, त्रास देखाई बलात्कार गरेको र गुहार मागेपछि जम्मा भएका गाउँलेले उनलाई नियन्त्रणमा लिई कारवाहीका लागि प्रहरीमा बुझाएको पीडितले बताइन् ।
पीडितको स्वास्थ्य परीक्षण राजविराजस्थित गजेन्द्रनारायण सिंह सगरमाथा अञ्चल अस्पतालमा ०७४ कात्तिक १६ गते भयो ।
जिल्ला अदालतको आदेशमा आरोपित पुर्पक्षका लागि ०७४ मङ्सिर १३ गतेदेखि राजविराज कारागारमा थुनामा छन् ।