इन्सेक सङ्खुवासभा प्रतिनिधि भविन कार्कीका अनुसार प्रतिनिधिसभा सदस्य निर्वाचन अन्तरर्गत सदरमुकाम खाँदबारीमा रहेको जिल्ला कारागारमा कैदीबन्दीका लागि गरिएको मतदान सम्पन्न भएको छ । कारागारमा रहेका कैदीबन्दीमध्ये मतदाता नामावलीमा समावेश ३३ जनाले मतदान गरेका छन् । कारागारमा रहेको अस्थायी मतदान केन्द्रबाट ३३ जना कैदीबन्दीले मतदान गरेको मतदान अधिकृत शोभा दाहालले जानकारी दिनुभयो । जिल्ला कारागारबाट शतप्रतिशत खसेको मतदान अधिकृत दाहालले बताउनुभयो । जिल्ला कारागारमा मतदाता नामावली भएका २८ पुरुष र पाँच महिला कैदी बन्दीले मतदान गरेको मतदान अधिकृत दाहालले बताउनुभयो । त्यस्तैगरी अस्थायी मतदान केन्द्रबाट १२ बजेसम्म ५१ जनाले मतदान गरेका छन् । जिल्लामा १ हजार ३ सय ९७ अस्थायी मतदाता रहेका छन् । निर्वाचनलाई व्यवस्थित तथा शान्तिपूर्ण रूपमा सम्पन्न गर्न आवश्यक सुरक्षा व्यवस्था मिलाइएको थियो ।

इन्सेक मधेश प्रदेश कार्यालयका अनुसार दुई पक्षबीच विवाद भएपछि महोत्तरीको बर्दिवासस्थित प्रेमनगर मतदान केन्द्रमा  स्थगित मतदान प्रक्रिया सुचारु भएको छ । सो मतदान केन्द्रमा २ घण्टापछि मतदान प्रक्रिया सुचारु भएको हो । केही मतदाताले दोहोर्‍याएर मतदान गर्ने प्रयास गरेपछि विवादको  स्थिति सिर्जना भएको थियो । साढे १० बजेदेखि स्थगित भएको मतदान प्रक्रिया  १२ बजेर ५६  मिनेटमा सुचारु भएको महोत्तरीका प्रमुख जिल्ला अधिकारी इन्द्रदेव यादवले जानकारी दिनु भयो । विवादको क्रममा  वडाध्यक्ष भोरिल यादव तथा नेपाली कम्युनिस्ट पार्टीका कार्यकर्ताहरूबीच झडप हुँदा वडाध्यक्ष यादव सामान्य घाइते समेत भएका थिए ।

इन्सेक सर्लाही प्रतिनिधि बुधन साहका अनुसार सर्लाहीको बलरा नगरपालिका–४ मा रोकिएको मतदान पुन: सुरु भएको छ । केहीबेरअघि रास्वपा उम्मेदवार अमरेशकुमार सिंह मतदान केन्द्र पुगेसँगै विपक्षीले विवाद सुरु गरेका थिए । मतदान अहिले सुरक्षित र सामान्य रुपमा जारी रहेको छ ।

इन्सेक मधेश प्रदेश कार्यालयका अनुसार महोत्तरीको बर्दिवास नगरपालिका –७ स्थित प्रेमनगरमा कांग्रेस र नेपाली कम्युनिष्ट पार्टीबीच  दोहोरो मतदान गरेको विषयमा विवाद सिर्जना भएपछि मतदान प्रक्रिया स्थगित भएको छ । केही व्यक्तिले दोहोर्‍याएर मतदान गर्न खोजेपछि झडपको स्थिति सिर्जना भएको स्थानीयले बताएका छन्।

एक व्यक्तिले चार पटकसम्म मतदान गर्ने प्रयास गरेको वडा अध्यक्ष भोरिल यादव  बताउनु भयो । मतदान पुनः सुचारु गर्नका लागि राजनीतिक पार्टीका प्रतिनिधिहरुबीच छलफल भइरहेको मुख्य निर्वाचन अधिकृत गगनदेव महतोले बताउनु भयो ।

इन्सेक ओखलढुंगा प्रतिनिधि सरस्वती बानियाका अनुसार मानेभन्ज्याङ टोक्सेलका स्थानीयले मतदान बहिस्कार गरेका छन् । हालसम्म मतदान शुन्य छ, केन्द्रमा मतदाता नआएकाे मानेभन्ज्याङ गाउँपालिका–७ स्थित शहिद स्मृति आ.वि, सातसल्ले मतदान केन्द्रकी मतदान अधिकृत परवासी राईले बताउनुभयाे ।

इन्सेक उदयपुर प्रतिनिधि राकेश नेपालीका अनुसार उदयपुरको कटारी नगरपालिका वडा नम्बर ३ स्थित तरकारी तथा फलफूल बिक्री केन्द्र, तावाखोला (क) मतदान केन्द्रमा खटिएका प्रहरी जवान निरज महतमानले बोकेको सर्टगन अचानक पड्किँदा प्रत्यक्ष तर्फको मतपेटिकामा क्षति पुगेको छ। यद्यपि त्यहाँ मतदान कार्य रोकिएको छैन र हाल सुचारु रहेको जानकारी प्राप्त भएको छ।

इन्सेक मोरङ प्रतिनिधि विनोद सुवेदीका अनुसार विराटनगर- ३ स्थित औषधि व्यवस्था विभाग मतदान स्थल नजिक मतदाताहरूका लागि नेपाली कांग्रेस र रास्वपाले भोज गरेको पाइए पछि मोरङका प्रमुख जिल्ला अधिकारी, प्रहरी प्रमुख लगायतको टोलिले भोज भतेरका लागि प्रयोग गरेका सामाग्री हटाउन निर्देशन दिएपछि भोजका सामग्री हटाउँदै कार्यकर्ताहरू ।

इन्सेक पर्यवेक्षक कृष्ण प्रसाद पाण्डेका अनुसार कास्की कारागारमा यसपटक शतप्रतिशत मतदान भएको छ । अस्थायी मतदान केन्द्रको रूपमा स्थापना गरिएको कारागारभित्र नामावलीमा सूचीकृत सबै ३७ जना कैदीबन्दीले आफ्नो मताधिकार प्रयोग गरेका छन् ।

मतदान अधिकृत गोविन्द श्रेष्ठका अनुसार बिहान ७ बजेदेखि सुरु भएको मतदान प्रक्रिया करिब साढे दुई घण्टामै सम्पन्न भएको थियो । कारागारभित्र ३८ जनाको नाम मतदाता नामावलीमा समावेश भए पनि एक जना धरौटीमा छुटेकाले ३७ जनाले मात्रै मतदान गरेका हुन । । तीमध्ये दुई जना महिला कैदीबन्दी रहेको श्रेष्ठले बताउनुका साथै ३ जना कर्मचारीले पनि मतदान गरेपछि सो केन्द्रमा कुल ४० मत खसेको श्रेष्ठले जानकारी दिनुभयो । कारागारमा हाल ६ सय ९७ जना कैदीबन्दी रहे पनि निर्वाचन आयोगबाट प्रमाणित भई नामावलीमा समावेश भएका व्यक्तिहरूले मात्र मतदान गर्न पाउने व्यवस्था रहेको छ ।

इन्सेक पर्यवेक्षक भोलानाथ पौडेलका अनुसार बारा जिल्लाको सिम्रौनगढ नगरपालिका–३ स्थित नेपाल राष्ट्रिय प्राथमिक विद्यालय किसनपुर मतदानस्थलमा खटिनु भएका निर्वाचन अधिकृत श्याम प्रसाद साह ११ बजे अचानक बेहोस हुनुभएको छ। जिल्ला निर्वाचन कार्यालय बाराका अनुसार प्रतिनिधिसभा सदस्य निर्वाचन २०८२ अन्तर्गत मतदान कार्य जारी रहेको समयमा अचानक स्वास्थ्यमा समस्या देखिएपछि उहाँ बेहोस हुनुभएको हो। घटनापछि त्यहाँ खटिएका कर्मचारी तथा सुरक्षाकर्मीले तत्काल उद्धार गरी उपचारका लागि बाराकै सिम्रौनगढमा स्थानीय अस्पतालमा लगिएको छ। निर्वाचन कार्यालयका अनुसार उक्त घटनापछि पनि सो मतदानस्थलमा कर्मचारीको समन्वयमा मतदान कार्य नियमित रूपमा सञ्चालन भइरहेको बताइएको छ।

इन्सेक सिन्धुपाल्चोक प्रतिनिधि नातिबावु धितालका अनुसार सिन्धुपाल्चोक क्षेत्र नं. २ को नेपाली कम्युनिष्ट पार्टीका उम्मेदवार युवराज दुलालले निर्वाचन आचार संहिता उल्लङ्घन गरेको भन्दै ०८२ फागुन २१ गते उम्मेदवारी खारेजीको माग गर्दै मुख्य निर्वाचन अधिकृतको कार्यालयमा उजुरी परेको छ ।

तारा चिन्ह लिएर उम्मेदवार भएका दुलालले फागुन २० गते राती चौतारा सागाचोकगढी नपा १३ स्थित ठूलोसिरुवरीमा गएर मतदाताहरुलाई रकम दिएर तारा चिन्हमा भोट माग्दै मतदाताहरुलाई प्रभावित गराएको भन्दै उजुरी परेको हो ।

नेकपाका उम्मेदवारले निर्वाचन आचार संहिता उल्लंघन गरेको भन्दै नेपाली कांग्रेसका प्रतिनिधि झलकबहादुर नेपाल, नेकपा एमालेका प्रतिनिधि भोला तमाङ र रास्वपाका प्रतिनिधि अपिल पुरीले हस्ताक्षर गरिएको उजुरी मुख्य निर्वाचन कार्यालयमा पुगेको हो । उजुरीमा उम्मेदवारी खारजी गर्नुपर्ने माग गरिएको छ । उम्मेदवार दुलालले मतदाताहरुलाई पैसा बाडेको भन्ने भिडियो समेत पत्रकारले सार्वजनिक गरेका छन् ।

इन्सेक दैलेख प्रतिनिधि अमर सुनारका अनुसार जिल्ला कारागारमा पाँच महिला सहित ३९ जना कैदीबन्दीले मतदान गरेका छन् । त्यहाँ खटिएका ६ जना कर्मचारी सहित ४५ मत खसेको दैलेख कारागार शाखा प्रमुख नृपजंग शाहीले जानकारी दिनुभयो ।

मतदाता नामावलीमा नाम दर्ता गराएका मतदाताले मात्र समानुपातिक तर्फ मात्र मतदान गर्न पाउने नियम अनुसार उनीहरुले मतदान गरेका हुन् ।

मतदाता नामावलीमा ४० जनाको नाम भए पनि एक जना बिरामी परेको कारण जिल्ला बाहिर उपचारत भएकोले छुटेका जनाइएको छ । दैलेख कारागारमा १६ महिला सहित १ सय ६१ जना कैदीबन्दी थुनामा छन् ।

इन्सेक दार्चुला प्रतिनिधि नरेन्द्रसिंह कार्कीका अनुसार अपिहिमाल ३ स्थित दुधिला आवि मतदान केन्द्रमा अहिलेसम्म काेही पनि मत हाल्न आएका छैनन् ।

त्यसैगरी नाैगाड गाउँपालिका १ नागु मतदान केन्द्र सुनसान ।

निकुञ्ज पीडितले गरेनन् मतदान

इन्सेक दाङ प्रतिनिधि जयनारायण पुनका अनुसार बबई गाउँपालिका- १ को जनता आबिजिला मतदान स्थल र बबई गाउँपालिका- ७ देउती माबी तल्लोमलाइ मतदान स्थलमा बिहान १०:३० बजेसम्म कुनै मत नखसेको जिला मतदान केन्द्रका मतदान अधिकृत टेकबहादुर खड्काले जानकारी दिनुभयो । जिलामा ६८२ मतदाता रहेका छ्न ।

इन्सेक दोलखा प्रतिनिधि उद्धव पाेखरेलका अनुसार तामाकोशी गाउँपालिका-४ मालु मतदान गर्ने क्रममा विवाद भएपछि मतदान नै रोकिएको छ ।  नेपाली कांग्रेस र नेकपा मिलेर बुथ कब्जा गरेपछि तनाव सिर्जना भएकाे थियाे । निर्वाचनमा खटिएका कर्मचारीमाथि हातपात हुन खोजेपछि प्रहरीले हवाई फायर गरेको थियो । हवाई फायरपछि नाराबाजी सुरु भएको थियो । साेही कारण अहिले मतदान स्थगित गरिएको छ । यसको विरोधमा एमाले र रास्वपाले नाराबाजी गरेका गरिरहेका छन् । सर्वदलीय बैठकबाट मुचुल्का तयार गरी पुन: मतदान प्रक्रिया सुचारु गर्न आवश्यक छलफल भईरहेको प्रमुख जिल्ला अधिकारीले  बताउनु भयो।

निर्वाचन आयोगले प्रकाशित गरेको विवरणअनुसार करिब १८,९०३,६८९ (१ करोड ८९ लाख)  मतदाता छन् । जसमध्ये ९,६६३,३५८ पुरुष, ९,२४०,१३१ महिला तथा करिब २ सय अन्य मतदाता रहेका छन् । प्रतिनिधिसभाका लागि प्रत्यक्षतर्फ १ सय ६५ र समानुपातिकतर्फ १ सय १० गरी २ सय ७५ जना निर्वाचित हुनेछन् । मतदान कार्य व्यवस्थित रूपमा सञ्चालन गर्न देशभर करिब १०,९६७ मतदान स्थल र २३,११२ मतदान केन्द्र स्थापना गरिएको छ । निर्वाचन सुरक्षाका लागि नेपाल प्रहरीका ७५ हजार ७ सय ९७ जना, सशस्त्र प्रहरी बलका ३४ हजार ५ सय ७६ जना, नेपाली सेनाका ७९ हजार ७ सय २७ जना, राष्ट्रिय अनुसन्धानका १ हजार ९ सय २१ र निर्वाचन प्रहरी १ लाख ४९ हजार ९० जना खटिएका छन् ।

मतदान स्थलहरू बिहानैदेखि खुला भएका छन् र मतदाता परिचयपत्रसहित हजारौँ नागरिक आफ्नो मताधिकार प्रयोग गर्न लामबद्ध भएका छन् । आजको मतदानले नेपालका लोकतान्त्रिक मूल्य–मान्यतालाई अझ सुदृढ गर्ने, समाजका सबै तहबाट सहभागिता सुनिश्चित गर्ने र भविष्यको नेतृत्व चयन गर्ने निर्णायक अवसर प्रदान गर्नेछ । यो निर्वाचनले देशको लोकतान्त्रिक प्रक्रियाको पुनःसुदृढीकरण गर्ने निर्णायक अवसर प्रदान गर्ने अपेक्षा गरिएको छ ।

पोखरा महानगरपालिका ८ मा बिहान ७ बजेबाट मतदान सुरु भयो । ४ हजार १ सय १७ जना मतदाता रहेको जनप्रिय माविमा चार ओटा मतदान केन्र रहेको सइ लाल बहादुर लामाले बताउनु भयो  ।

सुर्खेत विरेन्द्रनगर नगरपालिका -७ चित्राममा बिहान ७ बजेबाट मतदान सुरु भयो । २ हजार ८ सय ९१ मतदाता रहेको श्री कृष्ण संस्कृत तथा साधारण माविमा तीन मतदान केन्द्र रहेको इन्सेक कर्णाली प्रदेशका संयोजक नारायण सुवेदीले बताउनु भयो ।

इन्सेक प्रतिनिधि जिवन खड्का अनुसार रुकुम पश्चिममा पनि मतदान सुरु

इन्सेक दार्चुला प्रतिनिधि नरेन्द्रसिंह कार्कीका अनुसार  बिहान ७ बजेदेखि मतदान सुरू भएको छ ।  सदरमुकाम खलंगा स्थित महेन्द्र नमुना मावि खलंगामा अपांगता भएका प्रमाेद सिह कुँवरले बिहान ७:१२ बजे पहिलो मत खसाले । यस्तै महाकाली नगरपालिका -५ स्थित अपि नाम्पा संरक्षण क्षेत्र ख मतदान केन्द्रमा बिहान ठिक ७ बजे मतदान सुरू भएको मतदान अधिकृत प्रमानन्द कुँवरले जानकारी दिनुभयाे । याे मतदान केन्द्रमा पहिलो मत भाेजराज बडूले मतदान गरेका छन् । जिल्ला प्रहरी कार्यालय दार्चुलाका अनुसार सबै ठाउँमा निर्वाचन सुरू भएको छ । दार्चुलामा ११२ मतदान स्थल, १४३ मतदान केन्द्र र २ वटा अस्थायी मतदान केन्द्र छन् ।

इन्सेक सप्तरी प्रतिनिधि नविन यादवका अनुसार प्रतिनिधि सभा सदस्य निर्वाचनअन्तर्गत सप्तरी जिल्लाका चारवटै निर्वाचन क्षेत्रमा आज बिहानदेखि मतदान कार्य सुरू भएको छ। बिहान ७ बजेदेखि जिल्लाभरका मतदान केन्द्रहरूमा मतदाताहरू उत्साहका साथ मतदान गर्न लाइनमा बसेका छन्। निर्वाचन आयोगले तोकेको समयअनुसार साँझ ५ बजेसम्म मतदान हुने छ। जिल्लाभरका सबै मतदान केन्द्रमा सुरक्षाकर्मी, कर्मचारी र स्वयंसेवकहरू खटाइएको छ। शान्तिपूर्ण रूपमा मतदान सम्पन्न गराउन नेपाल प्रहरी, सशस्त्र प्रहरी र नेपाली सेनाले सुरक्षा दिएको छ। ज्येष्ठ नागरिक, महिला तथा अपाङ्गता भएका मतदाताका लागि विशेष व्यवस्था समेत गरिएको निर्वाचन कार्यालयले जनाएको छ।

इन्सेक प्युठान प्रतिनिधि रविन्द्र पाण्डेका अनुसार  प्रतिनिधिसभा सदस्य निर्वाचनअन्तर्गत प्युठान जिल्लाका सबै मतदान केन्द्रमा बिहान ७ बजेदेखि शान्तिपूर्ण रूपमा मतदान सुरु भएको छ।

जिल्लामा रहेका १ सय ५८ मतदान स्थलका २ सय ३० वटै मतदान केन्द्रमा निर्धारित समयमै मतदान प्रक्रिया सुरु भएको प्रमुख जिल्ला अधिकारी शान्तिराज प्रसाईले जानकारी दिनुभयो।

उहाँका अनुसार सबै मतदान केन्द्रमा आवश्यक जनशक्ति, सुरक्षा व्यवस्था तथा निर्वाचन सामग्रीको व्यवस्थापन पूरा भई कुनै अवरोधबिना मतदान कार्य अघि बढिरहेको छ। मतदाताहरू बिहानैदेखि उत्साहपूर्वक मतदान केन्द्रमा उपस्थित भई आफ्नो मताधिकार प्रयोग गरिरहेका छन्।

निर्वाचनलाई स्वच्छ, निष्पक्ष र भयरहित बनाउन सुरक्षा निकायलाई उच्च सतर्कतामा राखिएको प्रशासनले जनाएको छ। हालसम्म जिल्लाभर कुनै अप्रिय घटना नभएको र मतदान प्रक्रिया शान्तिपूर्ण रूपमा सञ्चालन भइरहेको जनाइएको छ।

इन्सेक धनुषा प्रतिनिधि सन्तोष कुमार यादवका अनुसार धनुषा–३ बाट नेकपा एमालेका उम्मेदवार जुली महतोले जनकपुरधाम उपमहानगरपालिका–९, पुस्तकालय मतदान केन्द्रमा मतदान गर्नु भएको छ ।

त्यसैगरी धनुषा निर्वाचन क्षेत्र नम्बर १ का प्रतिनिधि सभा सदस्य पदका उम्मेदवार, नेपाली कम्युनिस्ट पार्टीका मातृका प्रसाद यादवले सबैला नगरपालिका –२ श्री रामप्रसाद माध्यमिक विद्यालयमा मतदान गर्नु भएको छ ।

त्यसैगरी धनुषा निर्वाचन क्षेत्र नम्बर ४ का प्रतिनिधि सभा सदस्य पदका नेकपा (एमाले) का उम्मेदवार रघुवीर महासेठ जनकपुरधाम–९ स्थित पुस्तकालय मतदान केन्द्र (बुथ) मा मतदान गर्दै।

इन्सेक सुदूरपश्चिम कार्यालयका अनुसार सुदूरपश्चिम प्रदेशका नौ ओटै जिल्लाका १६ ओटा निर्वाचन क्षेत्रका सबै निर्वाचन मतदान स्थलहरुमा ०८२ फागुन २१ गते विहान ७ बजेदेखि निर्धारित समयमै प्रतिनिधिसभा सदस्य पदका लागि मतदान कार्य सुरु भएको इन्सेकका जिल्ला प्रतिनिधि तथा इन्सेक पर्यवेक्षकहरुले जानकारी गराएका छन् । सुदूरपश्चिम प्रदेशका १६ ओटै निर्वाचन क्षेत्रहरुमा शान्तिपूर्ण रुपमा मतदान कार्य सुरु भइसकोको सुदूरपश्चि प्रदेश निर्वाचन कार्यालय, धनगढीका प्रमुख प्रमेराज भट्टले बताउनु भयो ।

निर्वाचनलाई शान्तिपूर्ण र भयरहित वातावरणमा सम्पन्न गर्न सुरक्षा व्यवस्थामा कडाइ गरिएको र मतदान केन्द्रहरुलाई मानव अधिकारमैत्री बनाउन सबै निर्वाचन स्थलमा कर्मचारीहरुलाई निर्देशन गरिएको र अपांगताभएका व्यक्ति, ज्येष्ठ नागरिक तथा गर्भवतीहरुका लागि मतदान गर्न लाइनमा बस्न नपर्ने व्यवस्था गरिएको समेत निर्वाचन कार्यालयका प्रमुख भट्टले बताउनु भयो ।

इन्सेक बैतडी प्रतिनिधि नरीदत्त बडुका अनुसार एक ओटा निर्वाचन क्षेत्र रहेको यस जिल्लाका सबै मतदान स्थलमा विहान ७ बजेदेखि शान्तिपूर्ण रुपमा मतदान सुरुभएको छ ।
डोटी जिल्ला प्रतिनिधि सुबास नेपालीका अनुसार एक ओटा निर्वाचन क्षेत्र रहेको यस जिल्लाका सबै मतदान स्थलहरुमा विहान ७ बजे निर्धारित समयमै मतदान कार्य सुरु भएको मुख्य निर्वाचन अधिकृतको कार्यालय,डोटीले जनाएको छ । इन्सेकबाट डोटी जिल्लामा पर्यवेक्षण गरिरहनुभएका नवराज जोशीका अनुसार जिल्लाका १ सय ८० मतदान केन्द्र र एक अस्थायी मतदान केन्द्रमा विहान ७ बजेदेखि नै शान्तिपूर्ण रुपमा मतदान कार्य सुरु भएको छ ।

इन्सेक जिल्ला प्रतिनिधि तथा पर्यवेक्षक नरेन्द्रसिंह कार्कीका अनुसार एक निर्वाचन क्षेत्र रहेको यस जिल्लाका दुधिला आधारभूत विद्यालय, झुकु,अपी हिमाल गाउँपालिका ३ र गौरीशंकर मावि, नागुनौगाड १ रहेका मतदान केन्द्रमा कोही पनी मतदान गर्न सहभागि नभएको भए पनि जिल्लाका अन्य सबै निर्वाचन स्थलमा विहान ७ बजेदेखि मतदान कार्य शान्तिपूर्ण रुपमा सुरुभएको जिल्ला निर्वाचन कार्यालयले जनाएको छ ।

इन्सेकका बाजुरा पर्यवेक्षक शर्मिला रोकायका अनुसार जिल्लाका सबै निर्वाचन स्थलमा मतदान कार्य निर्धारित समयमै सुरुभएको र स्वामीकार्तिक खापर गाउँपालिका वडा नम्बर ३ शुम्भु सुनन्दा माध्यमिक विद्यालय जुकुमा विहान ७ बजेदेखि मतदान सुरुभएको छ । यस मतदान केन्द्रमा ९ सय १८ जना मतदाता रहेका छन् ।

इन्सेक बैतडी पर्यवेक्षक शर्मिला भागतथी अवस्थीका अनुसार जिल्लामा विहान ७ बजेदेखि शान्तिपूर्ण रुपमा मतदान शुरु भएको छ । जिल्लाका सबै मतदान केन्द्रमा मतदान कार्य शुरु भइसकेको प्रमुख जिल्ला अधिकारी कृष्ण थापाले बताउनु भयो ।

जिल्लाका एक अस्थायीसहित २ सय १५ मतदान केन्द्रमा मतदान कार्य शुरु भइसकेको र शान्तिपूर्ण रुपमा मतदान कार्य भइरहेको प्रमुख जिल्ला अधिकारी थापाले बताउनु भयो ।
प्रतिनिधि सभा सदस्यका लागि एक निर्वाचन क्षेत्र रहेको यस जिल्लामा १० जना चुनावी मैदानमा रहेका छन् । यहाँ १ लाख ५६ हजार ३ सय ७२ मतदाता रहेका छन् ।

मतदान कार्यलाई शान्तिपूर्ण रुपमा सम्पन्न गर्नका लागि जिल्लाभरी उच्च सुरक्षा सतर्कता अपनाइएको प्रमुख जिल्ला अधिकारी थापाले बताउनु भयो ।

सबै मतदान केन्द्रहरुमा मतदाताहरुको सहजताका लागि आवश्यक व्यवस्थापन गरिएको जिल्ला निर्वाचन अधिकारी खगेन्द्र भारतीले बताउनु भयो । अपांगता भएका व्यक्ति, ज्येष्ठ नागरिक, महिला लगायतलाई मतदानमा सहज होस भनेर सोही किसिमले व्यवस्थापन गरिएको उहाँको भनाइ छ । साँझ ५ बजेसम्म मतदान कार्य सञ्चालन हुने भएकाले आफ्नो मतदान केन्द्रमा गएर मताधिकार प्रयोग गर्न जिल्ला निर्वाचन कार्यालयले आग्रह गरेको छ ।

इन्सेक कैलाली प्रतिनिधि मैनामोती चौधरीका अनुसार पाँच ओटा निर्वाचन क्षेत्र रहेको यस जिल्लाका सबै निर्वाचन स्थलमा विहान ७ बजेदेखि नै मतदान कार्य शान्तिपूर्ण रुपमा सुरु भएको सुदूरपश्चिम प्रदेश निर्वाचन कार्यालयका प्रमुख प्रेमराज भट्टले बताउनु भयो ।

इन्सेक प्रतिनिधि सन्तोष कुमार यादवका अनुसार  जनकपुरधाम उपमहानगरपालिका–४ स्थित प्रदेश वन निर्देशनालय मतदान केन्द्र बाहिर नेपाली कांग्रेसका कार्यकर्ताहरूले पम्प्लेट लिएर प्रचारप्रसार गरेको घटना सार्वजनिक भएको छ।

अनौपचारिक क्षेत्र सेवा केन्द्र (इन्सेक) धनुषाका परिवेक्षक बलिराम कुमार शाहका अनुसार मतदान केन्द्र बाहिर केही व्यक्तिहरूले नेपाली कांग्रेसका पम्प्लेटहरू लिएर प्रचारप्रसार गरिरहेका थिए।

घटनाबारे जानकारी पाएपछि सो स्थानमा खटिएको नेपाल प्रहरीले प्रचारका लागि प्रयोग गरिएका पम्प्लेटहरू नियन्त्रणमा लिएको उनले बताए। तर प्रचारप्रसारमा संलग्न व्यक्तिहरूलाई भने नियन्त्रणमा नलिइएको जनाइएको छ।

त्यसपछि नेपाल प्रहरीले माइकिङ गरेर मतदान केन्द्र आसपास क्षेत्रमा कुनै पनि प्रकारको प्रचारप्रसार नगर्न सर्वसाधारणलाई सचेत गराइरहेको परिवेक्षक शाहले जानकारी दिएका छन्।

इन्सेक दाङका पर्यवेक्षक एकराज भण्डारीका अनुसार दाङ क्षेत्र न. १ का नेपाली कांग्रेसका उम्मेदवार योगेन्द्र चौधरीले गढवा–४ को दिपेन्द्र होमजुन माविमा मतदान केन्द्रमा मतदान गर्नुभएको छ ।

त्यसैगरी दाङ क्षेत्र नं. १ का एमाले उम्मेदवार रेवतीरमण शर्मा घिमिरेले प्रावि दुमदुमा खैरीमा रहेको मतदान केन्द्रबाट पहिलो मतदन गर्नुभएको छ ।

इन्सेक बर्दियाका पर्यवेक्षक कवि पौडेलका अनुसार बर्दिया निर्वाचन क्षेत्र नम्बर १ का प्रतिनिधि सभा सदस्य उमेदवार (रास्वपा)ठाकुर सिह थारुले  बढैयाताल गाँउपालिका- ५ स्थित श्री नेपाल राष्ट्रिय इन्दिरा भुसाल माध्यमिक विद्यालय मतदान गर्नुभएको छ ।