नरहा गाउँपालिका–३ की ५० वर्षीया बौवावती महतोलाई कथित बोक्सीको आरोप लगाएर कुटपिट गरेको आरोपमा पीडित परिवारले सोही ठाउँका ६० वर्षीया झौलीदेवी सदा, १९ वर्षीय सञ्जित सदा, ५५ वर्षीय सुकन मण्डल र दुईजना नाम नखुलेका महिलाविरूद्ध इलाका प्रहरी कार्यालय मिर्चैयामा फागुन १ गते उजुरी दिएको छ ।
पीडितका अनुसार माघ २४ गते आरोपितहरूको परिवारले सञ्जितलाई बोक्सी लगाएर बिरामी पारेको भन्दै ठिक पार नत्र आगो लगाइदिन्छु भन्दै कुटपिट गरेका थिए ।
२० दिनदेखि आरोपित सञ्जित सदा बिरामी परेको र धामीझाँक्री लगाउँदा पीडित बोक्सी भएको भन्ने धामीबाट जानकारी भएपछि उनलाइ मेरो छोरा ठिक पारी दिन अनुरोध मात्र गरेको कुटपिट नगरेको आरोपित सञ्जितकी आमा जिबछी सदाले बताइन् ।
इलाका प्रहरी कार्यालय मिर्चैयाका डिएसपी सुकदेव खनालले घटनाको अनुसन्धान गरी आवश्यक कारबाही प्रक्रिया अगाडि बढाउने बताए ।